La ailad ka KSU ban plie biang ka SBI ha Phramer hadien ba pynbiang katto katne ki jingdawa

Syllad | The Rising MeghalayaAugust 27, 2021

Ka State Bank of India, Mynso Branch kaba don ha Phramer, West Jaintia Hills District kaba la shah khang tala ha ka Khasi Students’ Union (KSU) Jowai Circle la plie biang iaka haka sngi Thohdieng hadien ba ka bor pyniaid jong ka bank kala kular ban pynbiang ia baroh ki jingdonkam ban pynbiang iaka jingshakri sha u paidbah.

Ia kane ka bank ka KSU kala khang haka 24 tarik Nailar hadien ba kane ka bank kam shym la lah ban pynbiang iaka jingshakri ia u paidbah ka thain kiba kynshew pisa ha kane ka bank.

Ka KSU kala rai ban ailad ban plie iaka bank, hadien ba ki bor pyniaid ka bank kila wan ban iakynduh iaki nongialam ka KSU kaba kynthup ia President ka KSU Jowai Circle u Ioannis Suchiang, u General Secretary u Phraki Thubru bad kiwei kiwei.

Ki bor pyniaid ka bank kila kular ban pynbiang iaki jingdonkam bad iaka kor ATM kila pan por namar ba iaka machine yn wanrah na shabar, katba iaka kor update passbook la dep ban buh ha kane ka bank bad kawei kaban hap ban peit da hi nongtrei ka bank.

Khang tala ka KSU iaka SBI ha Phramer

Ha kajuh ka sngi ka KSU kala leit jurip iaka bank haka jingiadonlang u waheh shnong Phramer Yowphi Lyngdoh bad kala lap ba ka bank kala pyntreikam ia kane ka kor update passbook bad kala dawa na ki bor pyniaid jong ka bank ban pynkloi katba lah ban pynioh iaka ATM, ban thung nongtrei bad ban pynthikna ba kan pynbiang iaka jingshakri jong ka sha u paidbah nangne sha khmat khamtam ia uba duk ba suk.