Khang tala ka KSU iaka SBI ha Phramer

Syllad | The Rising MeghalayaAugust 24, 2021

Ka Khasi Students’ Union (KSU) Jowai Circle haka sngi ba Ar kala leit ban khang tala iaka SBI Bank Mynso Branch kaba don ha Phramer, West Jaintia Hills hadien bala kynnoh ba kane ka bank kala phiel haka jingai jngshakri ia u paidbah ka thain.

Kane ka jingkhang tala ia ka bank ka long hadien ba ka KSU kala ioh jingujor na u paidbah halor ka jingbym biang ka jingai jingshakri ka bank bad kam don wat tang ka kor ban update passbook bad ka kor ATM ban pynsuk ia u paidbah ban sei pisa, la ong u president KSU Jowai circle Ioanis Suchiang.

Ka KSU kala dep ban ujor sha u manager ka SBI Mynso Branch ha ka 22/6/2021 bad la ai por 1 bnai ban pynbiang ia ka jingdonkam u paitbah, hynrei ka KSU kala pynpaw iaka sngewsih ba wat hadien 2 bnai ruh ym don satia kino kino ki dak ki shin ba ka bank kan pynbiang iaka jingshakri jong ka.

Ka KSU kala ong ba kane ka bank kala leh bymsuidniew iaka jingeh u paidbah bad dei na kane ka daw kila shim iaka sienjam ban khangtala mardor iaka bank khnang ba ki bor ba dei peit jong ka kin shimkhia ban leh ia kaba donkam.