Ioh jingiarap ki samla nongialam ka Meghalaya ban pynneh ia ki jingdon jingem ka mariang
Ka kynhun ki samla nongialam na ka jylla Meghalaya ki la ioh ia ka jingiarap na ka Fellowship Program jong ki ri ka pyrthei halor ka Biodiversity Citizen Science kaba long shibynta jong ka Fellowship Program “One Million Leaders in Asia (OMLAS)” ba la pynlong da ka Nelis Global ha Tokyo, Japan.
Kane ka kynhun hapoh ka jingialam jong u Nathaniel Bhakupar Dkhar uba la ioh pdiang ia ka OMLAS Fellowship bad ka Joanica Delicia Jyrwa kum ka principal investigator ka dei napdeng ka kynhun ki riew shimet kiba don ka jingangnud ban pynneh pynsah ia ki jingdon jingsap ha ka mei mariang.
Na ka liang ka Kong Jyrwa ka la ong ba kane ka kynhun ka kynthup ia riew donsap na ka OMLAS, kata ki samla pule kiba mihkhmat na ki college bapher bapher na kane ka jylla, bad ruh ki riew shimet kiba dei na ki bynta bapher bapher jong ka ri kiba la wan shakhmat ryngkat lang na ka bynta kane ka projek.
Ka la ong ruh ba ki dkhot ka kynhun ki la sei ia ki jingtip bad ki jingdon na ka bynta ban iasam halor ka mariang bad ki jingdon jingem kiba don hapoh jong ka.
Nalor kata ka la kdew ruh ba ka thong kaba kongsan jong ka kynhun ka long ban pyndonkam ia kane ka projek na ka bynta ban pyniar ha kaba iadei bad ki jingialap halor ka jingkongsan jong ki jait jingthaw bapher bapher ha ka mariang kiba don hapoh kane ka jylla.Ka la ong ruh ba ka jingthmu ka long ban pynshai sha ki nongshong shnong halor ka jingdonkam ban pynneh pynsah ia ka jingriewspah ha ki jingdon jingem jong ka mei maraing.
Ka bynta ba kongsan ha kane ka jingtrei ka jong ki ka long lyngba ka jingiatreilang bad ka Indian Youth Biodiversity Network, ha kaba i kong Jyrwa i long kum ka state coordinator.
Kane ka jingiatreilang kan plielad ruh ia ka kynhun ba kan pyniar ia ka jingtreikam na ka bynta ban iasam lem ia ki jinglum jingtip ha ka por ba ki pyntreikam ia kane ka projek.
Shuh shuh ka kong Jyrwa ka pyntip ruh ba ka jingithuh bad ka jingai jingkyrshan pisa na ka Fellowship Program kan kyntiew bad pynshlur shuh shuh ia ki samla nongialam na ka bynta ban pynneh pynsah ia ki spah mariang tynrai ha kane ka jylla.
Leave a Reply