Leit ot ka MeECL ia ka lain bording na kumba 100 tylli ki longiing ba shong beain ha Lum Survey

Syllad | The Rising MeghalayaApril 27, 2024

Ka Meghalaya Energy Corporation Limited (MeECL) haka 26 tarik Iaiong, ka la leit ban ot noh ia ka lain bording na kumba 100 tylli ki longiing kiba shong ba sah beain ha ka lyngkhot jaka jong ka Shillong Cantonment Board (SCB) kaba don ha Lum Survey ha syndah ka Fire and Emergency Station hajan Iewduh, Shillong.

Ka jingkynnoh tuh bording da kine ki briew kiba shong ba sah beain ha kane ka jaka la lapdien hadien ka jingleit jurip da ka Seng Hynniewtrep Youth Council (HYC) haka 25 tarik Iaiong halor ka jingdon jong ki briew kiba shong ba sah beain hapoh ka jaka jong ka SCB, kata hadien ka jingioh pdiang ia kiba bun ki jingujor na ki riew paidbah.

Na ka liang ki heh ka tnat MeECL ha ryngkat ki bor pulit ha ka jingiadon lang ki dkhot jong ka seng HYC ki la shim mardor ia ka sienjam ban leit on ot ia ka lain bording bad kurup noh ia baroh ki waiar bording na katei ka jaka.

Ha katei ka jingleit jurip jong ka HYC, ka la lap ba ki don haduh kumba 80-100 tylli ki longiing kiba shong ba sah beain ha kane ka jaka da kaba shna ruh ia ki iing ker lyntang bad iingdara plastik.

Nalor kata haba bteng ia ka wad bniah, ka HYC ka la shem ruh ba kine ki briew ki la shu shong beain ha kane ka jaka khlem da ioh satia ia kano kano ka jingbit na ka Cantonment Board ne na kiwei pat ki bor ba dei khmih.