Dawa ka VPP ba ka Sorkar ka dei ban pynsangeh noh mardor ia baroh ki rukom shim jaka

Syllad | The Rising MeghalayaMarch 14, 2025

U nongialam ka Voice of the People Party (VPP) uba dei ruh u MLA ka Nongkrem u Bah Ardent M Basaiawmoit haka 3 tarik Lber u la dawa na ka sorkar Jylla ba ka dei ban pynsangeh noh mardor ia baroh ki rukom shim jaka ha ka Jylla.

Hashwa ban weng noh ia ka jingpynkylla ia ka ain ba la tyrwa na ka bynta ka Meghalaya State Investment Promotion & Facilitation (Amendment) Bill, 2025, u Bah Ardent u la ong, “Nga kyrpad ia u Myntri Rangbah ka Jylla ban pynsangeh noh ia baroh ki rukom shim jaka.”

Une u nongialam ka VPP u la kdew halor ka rai jong ka Meghalaya Industrial Development Corporation Limited (MIDC) ban pynpaw halor ka jingthmu ban shim ia ka jaka kaba heh haduh 300 akar na ka bynta ban pynlong kum ka jaka karkhana ha Ri Bhoi.

“Balei ka MIDC kan donkam kat ia kane ka jaka kaba heh? Ngim long pyrshah ia ki kam bei tyngka, ngim long pyrshah ia ka jingthmu jong ka sorkar ban pynroi shuh shuh ia ka jylla, hynrei ngi kwah ban pynthikna ba ki jaka ki dei ban sah bad ngi,” ong u Bah Ardent da kaba bynrap, “Kumta kumno phin pynthikna ba kine ki jaka ba ka sorkar ka la ioh kin sah bad bad ki trai shnong.”

Haba jubab, u Myntri Rangbah ka Jylla u Conrad K Sangma u la ong ba um lah ban ai ia kaba kum kata ka jingpynthikna hapoh ka iingdorbar ba yn pynsangeh noh ia baroh ki jingshim jaka.

Mynjur ka ïingdorbar iaka MSIPF Amendment Bill 2025 hadien ba rai ka Sorkar ban weng ka jingthaw ia ki Land Bank

“Kane ka long namar ba baroh ki jingshim jaka na ka bynta ki jingshna surok lem bad kiwei pat ki project la leh katkum ka ain. Mynta na ka bynta jong nga ban ong ba yn pynsangeh noh ia baroh ki jingshim jaka ia kata ngam lah ban ai ka jingpynthikna hapoh ka iingdorbar namar kata ka jingdawa ka long shabar jong ka jingpynkylla kaba ngi la wanrah mynta kasngi,” u la ong haba pynthikna ba ka Meghalaya Investment Promotion Authority (MIPA) kan ym don bynta ha kaba iadei bad ka kam shim jaka ne land bank.