Mynjur ka ïingdorbar iaka MSIPF Amendment Bill 2025 hadien ba rai ka Sorkar ban weng ka jingthaw ia ki Land Bank

Syllad | The Rising MeghalayaMarch 14, 2025

Ka ïingdorbar thaw ain ka Jylla ha ka 13 tarik Lber ka la mynjur ia ka Meghalaya State Investment Promotion & Facilitation (Amendment) Bill, 2025 hadien ba ka sorkar ka la rai ban weng noh ia ka kyntien, “ban thaw ia ki land bank lyngba ka jingthied beit beit ia ki jaka lane kiwei pat ki lad.”

Ia kane ka Bill ba la wanrah da u Myntri Rangbah ka Jylla u Conrad K Sangma la mynjur da ka jingkyrshan jong ki dkhot na baroh ka Liang Synshar bad Liang Pyrshah, kiba la pdiang sngewbha bad iaroh ia ka jingkloi jong ka sorkar ban sngap ia ka sur u paidbah ha ka sngi pynkut ia ka dorbar mang tyngka kaba 10 sngi hapoh ka ïingdorbar thawain.

Kane ka la wan long ruh hadien ka jingpyrshah kaba jur na baroh ki liang, kata kynthup na ki Sengbhalang. Na ka liang ka KSU ka la pynlong ruh da ka jingtur paidbah sha ka ïingdorbar ban dawa na ka sorkar ba ka dei ban pyndam noh mardor ia ka State Investment Promotion & Facilitation (MSPIF) Act, 2024.

Haba wanrah ia ka Amendment jong ka Bills, u Conrad Sangma u la ong, “Nga sngewkmen ban pyntip ba ngi la wanrah ia kane ka Amendment ha kaba ka kyntien kaba ong, “jingthaw ia ki land bank lyngba ka jingthied jaka kaba beit beit la weng bad pyndam noh khnang ban ai ia ka khubor kaba shai ba ka Meghalaya Investment Promotion Authority (MIPA) kam shym la wan da ka jingthmu ban thaw ia ki land bank bad ban ai jaka sha ki nongwan sengkam seng jam..”

U la ong ruh, “Kan ym don bynta shuh ha ka jingthaw ia ki land bank lane ban pynlang ia ki jaka lane kano kano ka jingthmu ban ai pateng ne ai wai ia ki jaka hynrei kan pynleit jingmut beit tang ban iarap wanrah ia ka jingsengkam sengjam, kata kaba la dep don lypa kiba pynsuk, bad baroh kine ki kyndon kin iaid katkum ka rule bad ka ain khnang ba ngin lah ban bteng ban wanrah ia ka rukom treikam kaba dei.”

“Kane ka pyni ba kane ka sorkar kam ju leh da ka bor. Kane ka sorkar kan sngew ia ka mon bad jingsngewkhia jong ki paidbah, ” u la bynrap.

U Conrad u la kular ruh ia ka Iing ba ka sorkar kan khot ia baroh ki kynhun bapher bapher kaba kynthup ia ki seng sain pyrthei bad kiwei kiwei ki kynhun ban iakren halor ki rule bapher bapher ia ki ban sa shna khnang ban iakren ia ki mat bapher bapher bad ki jingsngewkhia kiba don ha ka ain.

Nalor kata u pyntip ruh ba kane ka Amendment ba la tyrwa da ka sorkar ka la kdew ba ka MSIPF kan ym pynkhein ia ka Land Transfer Act, baroh ki rukom treikam, ki rule kiba buh beit bad ki rule kiba treikam sha ki ADC ruh yn bud ryntih nalor ka jingthungkam ia ki briew bad ki samla ka Jylla.

“Kine ki laitylli ki Amendment la wanrah khnang ban pynkmen ia ki nongshong shnong ka jylla bad ba baroh ki rule bad ki kyndon katkum ka Land Transfer Act bad ki rule jong ki ADC kin dei kiba bud beit ryntih,” u la ong. U Conrad u la ong ruh ba u la iakynduh ia ki MLA bad ki kynhun bapher bapher kiba la pynpaw ka jingsngewkhia halor ka mat kaba iadei bad ka land bank.

“Ki la don bun ngut ki MLA ka NPP kiba la wan iakynduh ia nga (kynthup u MLA na Mawkynrew, Jowai bad na Rilum Garo) bad kumjuh ki MLA na ka UDP kiba la pynpaw ia ka jingsngewkhia halor kane ka mat kaba iadei bad ka land bank ba la pynmih da ka MIPA. Dang ha kine ki khyndiat sngi ba la dep, ki dkhot ka KSU ruh ki la iakynduh ia nga bad ngi la batai bniah ia ki Amendment bapher bapher kiba la wanrah ban leh ei ei halor ka jingsngewkhia jong ki kynhun bapher bapher. Hynrei, wat hadien ki jingpynshai, nga dang don jingsngew ba kim don satia ia ka jinghun haba phai sha ka mat kaba iadei bad ka land bank,” u la ong.