Yuhkjat ka Health City Hospital wow pynman yaka screening kjut klongsnam ha Jowai, chem wa boon ki khynnah wa kjut

Syllad | The Rising MeghalayaJanuary 31, 2024

Ka Health City Hospital, Guahati chirrup i yakrehlang wa ka District Early Intervention Centre, Jowai hapoh ka Rashtriya Bal Swasthiya Karyakram (RBSK) da pynman ki ya ka Free Screening Congenital Heart Disease nae i peit i sylli ya ki khynnah wa em chitom ha u klongsnam.

Kani ka rukom eksamin nae sylli bniah yei man ki khynnah wa em chitom ha u klongsnam u man i ha ki ki Block wapher iong ka East wa ka West Jaintia Hills District heiwa ynne ha Jwai da pynman ya ka ha District Early Intervention Centre, Panaliar.

Ka Dr. Saurabhi Das, Director Paediatric Cardiology, Health City Hospital da khana ko wa i yasoi soskular nae MOU hapyrdi ka Sorkar Jylla wa ka Health City Hospital toh wow e i sumar wa makna ya kitu ki khynnah wa e mi chitom ha u klongsnam.

Chooh chooh da ong ko leh wa kat kam ka soskular kitu ki khynnah kiwa da dep Registered hapoh ka RBSK toh u ioh ki i sumar wa makna hapoh iong ka Health City Hospital, Guahati wei ya kani ka prokram daw pynman leh kawi ki District iong ka Jylla.

Ha kani ka sngi da em kamwa 122 ngut ki khynnah wa wan ha kani ka Free Screening Congenital Heart Disease wei na pyrdi kini 61 ngut toh kiwa emkam u ioh yei sumar, 10 ngut toh kiwa emkam u ioh yei boodien katwa 51 ngut wan toh ki wym em chitom.

Ka Dr Das, da ong ko wa i kjut klongsnam ki khynnah da chem wa em boon ngut. Naki 40 ngut kiwa dep leh screening da chem kamwa 20-25 kiwa em kjut. Da ong chuh chuh ko wa i kjut klongsnam joor bha i, wei na ki 50 percent wa sylli ki da chem iaki wa kjut katni.

Ka Dr. Das hei klam da kyrsu kyntu ko ya ki Manbei Manpa wow wan ki chakhmat u phah sumar ya ki khon iongki katwa ym pu joor ware i chitom wei ymtoh u kheinstin ki khnang iow ye u sumar yei kjut kat dang biar i por.