Yn wanrah u CM ka Meghalaya iaka Mang Tyngka ka ban kyrshan ia u paidbah

Syllad | The Rising MeghalayaFebruary 28, 2025

U Myntri Rangbah ka Jylla u Conrad K Sangma u la ong ba u la pynkhreh ban wanrah ia ka Mang Tyngka jong ka Jylla ka ban kyrshan ia u paidbah na ka bynta u snem Mang Tyngka 2025-26 ha ka Dorbar Mang Tyngka jong ka Iingdorbar Thaw Ain kaba shiphew sngi ka ban sdang naduh lashai ka sngi 28 tarik Rymphang.

“Ka dei ban long kaba kyrshan bad pynmyntoi ia ki nongshong shnong,” ong u Conrad haba kren sha ki lad pathai khubor ha ka 26 tarik Rymphang.

Hynrei watla katta u la ong ba ka Mang Tyngka jong ka Jylla kam long kum ka Mang Tyngka jong ka Sorkar Pdeng namar ba kam don jaka than ban pynrung khajna namar ba ki khajna ki dei kham bun ne duna ki sobjek jong ka Sorkar Pdeng.

“Kumta ka jong ngi ka dei kham bunsien ka Mang Tyngka kaba iadei bad ka jingpynlut. Kumta, ngi la shu tehlakam halor kiei kiba ngi la pynlut..Hooid ki don katto katne ki mat hangne hangtai kum ka royalty bad kiwei kiwei hynrei kata ka long kaba rit eh bad kam don jingktah than hynrei kaba lah ban rai ha kano kano ka por. Kumta ki rai kiba kongsan kiba iadei bad ka khajna la shim da ka Sorkar Pdeng ha kaba iadei bad ki khajna (direct and indirect taxes) Ki direct taxes la rai da ka GST Council, hynrei ka jong ngi ka kham iadei bad ki jingpynlut pynsep.”

U CM u la ong ruh ba ka sorkar ka dang trei ban pynthikna ba kan lah ban pynlut ha ka rukom kaba baroh ki bynta kin long kiba iadei dur.

“Ka jingpynlut ki jong ngi ka la kiew shisha mynta la buntylli ki snem bad ka la iaid biang ha kajuh ka lynti, ngin pynlut kham bun ban ia ka Mang Tyngka ka ban kham heh mynta u snem,” u la ong da kaba pyntip ba ka jingtreikam baroh kawei jong ka Jylla ka la kiew shisha ha kaba iadei bad ka jingpyntreikam ia ki skhim bapher bapher jong ka Sorkar Pdeng.

“Kumta ruh ngi la ioh tam shuh shuh ka jingiarap pisa bad dei na kata ka daw ngi hap ban kyntiew ia ka corpus fund namar ngi ioh ia ka pisa hynrei ka jingpynbiang ka long ha ka Mang Tyngka.Ha ka jingshisha ka long kaei kaei kaba bha.Kumta, kiba kum kine ki jingjia ki don hynrei ki jingbatai ba kham bniah ba shano ngin pynlut bad katno ngan la pyntip ha ka dorbar Mang Tyngka,” u la bynrap.

U CM un wanrah ia ka mang tyngka hapoh ka iingdorbar ha ka 5 tarik u Lber 2025.