Yn trei shitom ki 12 ngut ki MLA ka UDP ban pynkhlain na ka bynta ka elekshon 2028

Syllad | The Rising MeghalayaAugust 21, 2024

U nongialam ka United Democratic Party (UDP) uba dei ruh u Myntri kam Pohiing barim u Bah Lahkmen Rymbui ha ka 20 tarik Nailar u la ong ba baroh ki 12 ngut ki MLA jong ka party kin trei borbah na ka bynta ban pynkhlain ia ka party naduh ki shnong ki thaw hashwa jong ka elekshon MLA 2028.

Kane ka jingpynpaw ka jong u ka la wan long ruh shi sngi hadien ba ki laingut ki MLA ka Congress ki la leit ban pyniasoh ia lade sha ka party liang synshar National People’s Party (NPP).

Haba kren sha ki lad pathai khubor, u Bah Rymbui u la ong, “Ka UDP ka dei ka Seng Riewlum kaba la rim tam ha ka Jylla. Kumta baroh ki party kin pyrshang ban pynkhlain ia la ki jong ki jong ki nongrim bad kin pyrshang ban kyntiew ia ka jingdon briew hapoh ka iingdorbar Thawain. Kumta kum ka party, ngi baroh 12 ngut ki MLA ngin sa pyrshang ban trei shitom na ka bynta ban pynkhlain ia ka party jong ngi naduh hapoh ki shnong ki thaw khnang ba ngin iohi kumno kan long ha kane ka elekshon ka ban wan.”

Haba kylli halor ki sienjam ban khanglad ia ka jingpyrshang ban behthong ia ki MLA ka UDP, une u nongmihkhmat napoh Amlarem u la ong, “Ngan ym pyndonkam ia ka kyntien beh thong namar mano mano ba kwah ban leit sha kiwei ki seng ka dei ka jingsngew shimet jong ki namar ka dei ka kam shimet.”

“Na ka bynta jong ngi, kumba ka long mynta ngi don 12 ngut bad ngi la jop ia ka elekshon na ka UDP bad ngi bat skhem ia ki rukom pyrkhat jong ka party bad ngin pyrshang ban leh katba lah ym tang ban pynkhlain ia ka party, hynrei ban bishar bniah ruh kumba phi ong balei kiba bun ki MLA ki rung sha kiwei pat ki party, hynrei lada phin pynkynmaw ha ka samoi kaba la dep shwa ka elekshon, ngi don tang khyndiat ngut ki MLA kiba rung sha ka party, ngin ym duh jingkyrmen, ngin iai bteng ban trei shitom bad ban khring…,” u la bynrap.

Watla katta u Bah Rymbui u la ong ba ka jingtynjuh kaba khraw eh jong ka UDP mynta ka long ban pynkhlain ia ka ktem jong ka hapoh Rilum Garo.