Yn tohkit ki pulit iaki 2 ngut ki dkhot KSU halor ka jingshah pyniap ki lai ngut ki bar jylla ha Ichamati bad Mawlai Mawroh

Syllad | The Rising MeghalayaApril 24, 2024

Ki arngut ki samla kiba la shah kem noh ha ki pulit ha ka 23 tarik Iaiong u bnai halor ka jingjia shah pyniap ki nongbylla bar jylla ha Mawlai Mawroh bad Ichamati ki dei ki dkhot jong ka seng Khasi Students’ Union (KSU).

Kine ki arngut ki dkhot ka KSU ki dei kiba la tip kyrteng kum u Gary Mawlieh uba na Mawlai, uba la shah kem halor ka jingjia ha Mawroh bad uwei pat u samla Cleanstar Shabong na Nongthymmai uba shah kem halor ka jingjia ba jia ha Ichamati.

Haka 24 Iaiong, ka iingkashari district court ka la aiti ia kine ki arngut ki dkhot ka KSU kiba la shah kem noh ban set na ka bynta khadar bad hynniew sngi hapoh ka jingpeit jong ki pulit na ka bynta ban pynlong ia ka jingtohkit, ong u heh pulit.

Nalor kata u la ong ruh ba na ka liang ki pulit kin dang bteng ban kem shuh shuh ha kine ki sngi ki ban wan.

Kumba ka long mynta ki la don sawngut ki dkhot jong ka KSU kiba la shah kem noh ha kaba iadei bad kine ki artylli ki jingjia shah pyniap ha Ichamati bad ha Mawlai Mawroh.

Ha ryngkat ka jingiadon lang u President ka Seng u Samla Lambokstar Marngar lem bad kiwei pat ki nongialam ka Seng kiba la ialum hakhmat ka iingkashari ka district court, na ka liang u General Secretary ka KSU u Samla Donald V Thabah haba kren sha ki lad pathai khubor u la ong, “Ki dkhot ka seng KSU ki la shah kem haba don kino kino ki jingjia. Kane ka la jia ha ki snem kiba la leit noh bad ka dang iai bteng ruh haduh kine ki sngi kiba mynta.”

Ula ong ba “Ngi sngewthuh ba ka jingthmu jong ka sorkar ban kem bad set ia ki dkhot jong ka KSU ka long ban pyntieng pynsmiej ia ki ba kin pyniaid shakhmat ia ki jingtreikam jong ki na ka bynta ka bha ka miat jong ki trai ri trai muluk, hynrei ka khubor ka jong ngi sha ka sorkar ka long, leh katba phi kwah ban leh, kem ia ngi, set ia ngi, bom ia ngi, hynrei kine kin ym lah ban khanglad ia ngi ba ngin pyniaid shakhmat ia ki jingkut jingmut bad ia ki jingtreikam kiba iadei ban aijingiada halor ki hok jong ki trai shnong riewlum kiba dei ki Khasi.”

Nalor kata u la ong ruh, “Ha kaba iadei bad ka jingjia shah pyniap jong u Bah Lurshai Hynniewta ha Ichamati ki pulit ki la kem ia bun ngut ki briew, bad bun bah ki la shah khot hajir, hynrei ym shym la don ki ban wan hakhmat ka kashari bad kiba bun na ki, ki la jah rngai bad ki pulit kim shym la kem ia ki lane set phatok ia ki.”

U Bah Thabah u la ong, “Ngin dang shim ia ka rai hynrei ngi maham jur ia ka sorkar ba lada ka dang iai bteng ban kem bad set ia ki dkhot ki jong ngi, ngim banse ban shim da ki sienjam kiba tyngeh.”