Yn sdang kham slem ia ka tamasa Cherry Blossom ha ka sngi pynkut
U Symbud Myntri Rangbah ka Jylla, u Bah Prestone Tynsong haka sngi Palei u la ong ba na ka liang ka sorkar kala bthah ia ki nongpyniaid jong ka tamasa Shillong Cherry Blossom ba kin pynsdang ia ka tamasa ha ka sngi pynkut, kata ha ka sngi U Blei hadien ba la wai ki Jingiaseng, kata hadien ka jingmih jong ki jingpyrshah.
Haba kren bad ki ladpathai khubor, u Myntri ula ong “ Lada phi iakren halor ka Sngi U Blei ne Sngi Saitjain ne Sngi Thohdieng ki don ki por ba ka sngi pynkut/khatduh ka jia ha ka sngi U Blei lane lehse ka sdang ha ka Sngi U Blei ne Sngi Saitain ne Sngi Thohdieng. Nga kular sha ki paidbah ka jylla ba kane kam dei kaba ngi kwah ban leh ha ka sngi U Blei hynrei kane ka tamasa ka dei kaba lai saw sngi bad kumta ka jia ryngkhat ba ka kut ha ka Sngi U Blei”.
“Kaei kaba ngi rai ka long ba ngi la dep bthah ia kito kiba pyniaid ia ka tamasa ba ha kane ka kylla ba mynta namar ba ka kut ha ka Sngi U Blei, ai ba kin pynsdang noh ia ka tamasa hadien ka 3 baje janmiet jong ka Sngi U Blei, kata hadien ba kut ki Jingiaseng” ula bynrap.
Nalor kata u la ong ruh; “Nga buh ka jingkyrpad ia baroh ba kin sngewbha ban long kiba jai jai bad ngin sa iapeit pat naduh u snem ban wan kumno ban khein ia ki sngi khnang ba baroh kin iakmen lang bad baroh kin ioh jingmyntoi na kane ka tamasa”.
Lah ban kdew ba na ka liang u Myntri ka tnat Tourism ka sorkar jylla u Bah Paul Lyngdoh dang shen ula ong ba ka don ka buit politik ha lyndet kane ka jingpyrshah ban pynlong ia kane ka tamasa ha ka Sngi U Blei.
Ha kaba iadei bad kane, na ka liang u Bah Prestone ula ong ba kam don satia kano kano ka jingbakla ia ki briew ba kin pynpaw ia ka jingsngew halor ka phang.
Leave a Reply