Yn pynlong ka KSU-NKHD da ka Free Coaching Class ia ki samla ba kwah iakhun CUET

Syllad | The Rising MeghalayaApril 6, 2024

Ka Education Cell jong ka Khasi Student Union (KSU) North Khasi Hills District haka 6 tarik Iaiong, ka pyntip ba kan pynlong ïa ka jingai jinghikai ei (Free Coaching Class) na ka bynta ki khun samla kiba la pyndep ïa ka Class XII bad kiba pynkhreh ban ïakhun ïa ka Common University Entrance Test (CUET) ban rung class sha ki College bapher bapher ha ka jylla bad shabar jylla.

Haba kren sha ki lad pathai khubor u Samla James Hitler Mawphniang General Secretary ka Seng u la ong ba kum ka seng kala pynkhreh ban aijinghikai ei na ka bynta ki khun samla kiba pynkhreh ban ïakhun ïa ka CUET Exam na ka bynta ki Under Graduate ha ka jingïatreilang ryngkat bad ka El Elyon Institute kaba don ha Nongpoh Town Shopping Complex.

U la ong ruh ba ka seng ka la pynkhreh ban ai ka jinghikai sha ki samla namar katei ka exam ba la pynlong da ka NTA ka dei kaba dang thymmai ïa kiba bun ki khun samla bad ki donkam ka jinghikai bad ka jingbtin lynti khnang ba kin tip kumno ban pynkhreh bad ban ïakhun ïa kane ka eksam CUET.

Nalor kata ka Seng ka pyntip ruh ba ïa ki form la pyllait naduh kane hi ka sngi haduh ka 19 tarik mynta u bnai, bad ka jingshim klas kan sdang naduh ka 22 tarik  naduh ka por 3 baje janmiet.

Kumta ka Seng ka kyrpad ïa ki khun samla ka district Ri-bhoi ban shim kabu na ka bynta ban ioh ïa katei ka jinghikai bym donkam jingsiew, katba na ka bynta kiwei pat ki khun samla na kiwei ki district ki bym lah ban wan sha Ri-Bhoi ki lah ban leh lyngba ka Online Mode bad ïa ka jingtip ba kham bñiah ki lah ban ïakynduh bad ki dkhot ka KSU lane ban leit mih sha El Elyon Institute ha Nongpoh.