Yn pynlong ka AMKA da ka Karate Tournament na ka bynta ki skul bad college
Ka All Meghalaya Karate-Do Association (AMKA) kan pynlong ia ka jingiakop ialehkai Karate ba ju pynlong man la u snem na ka bynta ki skul bad college naduh ka 22 haduh ka 24 tarik u Nailar 2024 ha kane ka nongbah Shillong.
Ia kane ka jingialehkai ba la tip kum ka “30th Inter School bad 12th Inter College Karate Tournament 2023” yn pynlong hapoh Multipurpose Indoor Hall jong ka Sport Authority of India’s Shillong Training Centre hapoh NEHU campus, Shillong.
Ia kane ka jingialehkai ba la khot pynlong da ka AMKA la aijingkyrshan da ka Tnat Directorate of Sports and Youth Affairs, ka sorkar Jylla.
Da ki spah ngut ki nongialehkai karate na ki phew tylli ki skul bad college la khmih lynti ba kin wan iashim bynta ha kane ka jingiakop kaba laisngi kynthih ha kaba yn lah ruh ban sakhi ia ki sap ki phong jong ki khynnah bad ki samla ka jylla ha kane ka jingialehkai.
Lyngba kane ka jingiakop ki nongialehkai karate ki lah ban pynpaw ia ki sap jong ki ha ka rukom jong ka jingiakhun (sparring) lane kata (form), bad kiba bun na ki nongialehkai ki la nangkiew shaphrang lyngba kane ka tournament naduh ki snem kiba la dep bad ioh lad ban leit iashim bynta ha ki rynsan kiba heh hapoh ka ri bad shabar ri kumjuh da kaba wanrah ruh ia ki Takma na ka bynta ka jylla Meghalaya bad ka Ri India hi baroh kawei.
Ha ka jingiakop kaba la long ha u snem 2023 ba la dep, ka St Anthony’s Higher Secondary School ka la wan ha ka kyrdan kaba nyngkong ha ka inter school hapdeng ki khynnah shynrang, katba ka OM Roy Memorial Higher Secondary School ka la ioh ia ka jingjop ha ka liang ki kynthei katba ka St Anthony’s College ka la jop ha ka jingiakop hapdeng ki college.
Kumta la kyntu ia kito kiba kwah ban iashim bynta ha kane ka jingiakop mynta u snem kin phone sha kine ki nongialam ka AMKA ha kine ki nombor 9774062118, 8837348536, 9856623718, 9378186278, 8794468993.
Facebook
Instagram
Youtube
Twitter
Leave a Reply