Yn pynïasoh ïaka shnong Umsaw bad ka Umïew

Syllad | The Rising MeghalayaDecember 29, 2020

U Bah Lambor Malngiang haka sngi Nyngkong ula hiar jurip ia ka surok shnong jong ka Umsaw ban pynïasoh ïaka shnong Umïew, kaba hap ha Mylliem Lum, Nongkrem.

Ha kane ka jinghiar jurip u Bah Lambor Malngiang MLA, MDC ka Nongkrem ula iakynduh iaki nongialam shnong ban iakren bad pynbeit ban shna noh ia kane ka surok ban pynsuk ïaki nongshong shnong bad ki paid nongrep ka thain.

KI riewrangbah ka shnong Umsaw kila pynpaw ba kin aiti noh ia ka surok ban pyniasoh ia katei ka shnong bad ka shnong Umïew sha ka tnad PWD (Roads) na ka bynta ban ïoh skhim ban shna ïaka surok kaba paka.

“Kane ka surok kan pyniajan bad pynsuk iaki nongshong shnong ka thaiñ Mylliem Lum hi baroh kawei. Kiba wan na ka thaiñ Smit ne Nongkrem na ka bynta ki jingdonkam jong ki kim donkam shuh ban iaid pyllun ia ka shnong Pomlakrai ne Laitkor”, la ong u Bah Lambor.

“Baroh shikatta ki nongshong shnong ki hap ban iaid 8-9 KM, hynrei lada ioh ia kane ka surok na Umsaw kan pynjan ia ki nongshong shnong bad ki donkam ban iaid tang kumba 2 haduh 3 KM,” la ong u Bah Lambor.

Kane ka surok kumba long mynta kadei ka surok khyndew bad la shna malu mala da u MLA ka thain ban ioh iaid ki nongshong shnong bad ïoh kit jingkit ki nongrep ha katei ka thaiñ, hynrei haka aiom slap ka shitom iaki nongrep ban iaid ban ieng na kane ka surok.

Ïa kane ka surok u MLA ula kular ban pynioh noh da ka surok rong bad yn aiti ha ka tnad PWD ba kan wan thew wan woh ia ka bad ban peit bniah kiei kiba donkam ban leh ban pynurlong iaka jingangnud u paidbah.

Na ka liang ki riewrangbah ki la ai khublei ia u Bah Lambor uba la mang ban pynshna ia ka surok. “Ngi sngewthuh ba kam long kaba suk hynrei ngin aiti ia ka surok sha ka tnad PWD bad ngin ia treilang bad u MLA ban pynurlong ia kane ka jingangnud jong ngi na ka bynta ka thaiñ Mylliem Lum hi baroh kawei”, ki la ong.