Yn pyni ia ka series ‘Postcards from Meghalaya’ lyngba ka National Geographic

Syllad | The Rising MeghalayaJune 11, 2024

Ka Tnat Toursim ka sorkar Jylla ka la pynbna halor ka jingpyni ia ka series ‘Postcards from Meghalaya’ lyngba ka National Geographic, bad kane ka thmu ban pynpoi ia ki nongwan shangkai sha ki jaka kiba itynnad jong ka Meghalaya, kata kaba pyni ruh halor ka jingriew spah ha ka liang ka kolshor, ka jingdon ia ki lum ki wah kiba itynnad bad ki jingbam ba bang ba thiang.

Ia kane ka prokram ba la pynmih da ka National Geographic Creative Works, ka ‘Postcards from Meghalaya’ ka tyrwa sha ki nongwan shangkai ia ki jaka jngohkai kiba itynnad kiba kim pat ju tip shaphang kane ka jylla bad ia ka riti dustur jong ka. Na ki lynti surok ba bunbriew ha ka nongbah Shillong sha ka jaka um kaba itynnad jong ka pung Umiam bad ka jaka ba pawkhmat ka ‘living roots bridges’ ha Nongriat, kane ka prokram kan pyni ruh ia kiba bun ki jaka jngohkai kiba itynnad ha Meghalaya.

Man la ki bynta ne episode yn pyni ia ka jinglong kyrpang jong ki trai shnong ha ka liang ka riti dustur, ki jingnang jingstad tynrai jong ki Khasi kaba don ia ka jingiadei kaba jan bha bad ka mariang bad halor ka bynta kum ki nongsumar ban pynneh pynsah ia ka mei mariang.

Ia kane ka prokram la pyniaid bad pynbit pynbiang da ka Larisa D’Sa kan batai bniah ha kaba iadei bad ka jinglong jingman jong ka Jylla bad halor ka jingdon jong ka thain ia ki jaka kiba itynnad bad kiba khring shibun ia ki nongwan shangkai na kylleng. Nalor kata ka la pnpaw ia ka jingsngewkmen halor kane ka jingiaid lynti ba marwei jong ka ha Meghalaya khamtam ha ka ban lap ia ki spah tynrai ba la buhrieh da ka mariang, ka jingriewspah ha ka kolshor bad da kaba khot sngewbha ia kiwei ba kin pyniasoh lang bad ka ban ioh mad ia kane ka jingphylla ha ka sien kaba nyngkong.

Ka Meghalaya ia kaba la ju tip kum ka “Abode of Clouds,” bad kadei kaba pawnam ruh ha kaba iadei bad ka jingdon ia ka kolshor kaba kyrpang bad kane ka prokram kan plie lad ia ki nongpeitkai ba kin iohi ia ka rukom im, ka rwai bad katem ka put, kynthup ia ka riti dustutr tynrai bad ki jingbam tynrai kiba khring ia ki nongwan shangkai.