Yn plie noh ia ka leit ka wan ki kali na jingkieng Umiam; dang khang iaid ia ki kali heh

Syllad | The Rising MeghalayaJuly 29, 2024

Ka sorkar Jylla ka la pynbna ban plie noh ia ka leit ka wan jong ki kali na baroh arliang surok jong ka jingkieng Umiam (Dam) kumba ju long baroh shi katta naduh lashai ka sngi 30 tarik bad pynkut noh ia ka jingpyniaid kaba tang shiliang surok kaba la iaid mynta lah kumba phra bnai kynthih.

Ia kane la pyntip da u Myntri ka tnad Bording u AT Mondal hadien ka jingialang jong ka High Powered Committee ba la pyniaid da u Symbud Myntri Rangbah ka Jylla u Bah Prestone Tynsong haka 29 tarik Naitung

Watla katta na ka liang u Mondal u la ong ba yn dang khang ia ki kali kiba khia palat 4 metric ton ba kin iaid lyngba jong kane ka jingkieng.

U la ong ruh ba na ka liang ka tnad PWD kan sa pynieng da ki jingker ban pyrkhing ia ka jingiaid jong ki kali heh, bad la pyndait ruh da ki CCTV Camera ban khmih bniah na ka bynta ka jinglong jingman bad ka jingshngain jong ka dam.

Haba kren sha ki lad pathai khubor u Myntri u la ong ruh ba ka sorkar kan sa shim ia ka rai ban plie noh ia kane ka jingkieng hadien ka jingmynjur na ka IIT Guwahati kaba la pynthikna halor ka jingshngain ia ki kali ba kin iaid lyngba kane ka jingkieng.

U la ong ruh ba ka jinglut jingsep ha kaba iadei bad kane ka jingshna pynkhlain bad maramot ia kane ka jingkieng dam ka la kot sha ka T.19 klur, bad mynta la pynjlan shuh shuh ia ka rta jong kane ka jingkieng sah da kumba arphew snem.

Ha kaba iadei bad kiwei pat ki lynti iaid kali ban pynkiar lyngba kane ka jingkieng, u Myntri u la ong ba la pynkhamti ia kane sha ka tnad National Highway Authority of India (NHAI) kaba la pyniaid mynta shakhmat ia kane ka kam.