Yn nang pynjur ka jingdawa College Sorkar ha East Jaiñtia & kiwei ki jingdawa ba sahteng: JSM

Syllad | The Rising MeghalayaMarch 30, 2019

JOWAI: Ka Jaiñtia Students’ Movement (JSM) haka CEC kaba dang shu dep shen kala rai ban nang pynjur ïaka jingdawa ban wanrah ïaka College Sorkar ha East Jaiñtia Hills District bad kiwei kiwei ki mat jingdawa ba sahteng.

U President jong ka JSM Leningstar Rymbai, ula ong ba ha kane ka CEC kila shim ka rai ban nang nang pynjur ka jingdawa ban wanrah ïaka College Sorkar ha East Jaiñtia Hills namar ba haduh mynta kane ka District kam don College Sorkar, lait noh ka Jaiñtia Eastern College kaba pynïaid da ki riew shimet.

“Ka jingdawa ban wanrah ïaka College ha kane ka District kala sdang naduh u snem 2016 namar ba ngi kwah ba ki samla pule ka thaiñ (Kiba bun kiba wan na ki longïing ba duk) kin ioh ban bteng haka jingpule haka kyrdan bapher bapher hapoh ka District, khlem da hap ban beh sha ki jaka sor ban bteng jingpule kaba ktah ïaka ioh ka kot jong ki”, la ong u Leningstar bad bynrap ba ka pule puthi ha East Jaiñtia Hills District lada ïanujor bad kiwei ka dang sahdien bha bad bun bah ki samla kila sangeh ban bteng ka jingpule hadien ba pyndep matrik bad klas XII.

Kiwei kiwei ki mat jingdawa ka dei ka jingdawa ban buh Police Out-Post ha Psiar ( ki jaka ba hap ha khappud Assam-Meghalaya), Huroi Hingaria bad Bataw Lakadong.

Kiwei kiwei ki mat ba iakren ka dei halor ka koit ka khiah, ka um bam umdih bad kiwei kiwei ki jingmyntoi ba ka District ka dei ban ioh.