Yn leit ïakren hadpeng ka bor district West Jaintia Hills iaka West Karbi Anglong halor ka ktem pulit ha Saba

Syllad | The Rising MeghalayaJune 22, 2021

Ka bor synshar district West Jaintia Hills haka sngi Nyngkong kala rai ban leit iakynduh bad ka bor synshar district jong ka West Karbi Anglong, Assam ban kyntu ban sangeh pyntreikam iaka ktem Pulit ne ka Border Police Outpost kaba don haka shnong Saba.

Ia kane ka rai la shim haka jingialang kaba long hadpeng ki kynhun sengbhalang ba kynthup iaka Jaiñtia Students Movement (JSM), ha Hynniewtrep Border Dispute Redressal Forum (HBDRF), Hynniewtrep Women Welfare And Development Organisation (HWW&DO) bad ka All Hynniewtrep People United Front (AHPUF).

Kumban shu pynkynmaw ba kane ka ktem pulit ka dei kaba la shna naduh u bnai Iaiong jong une u snem bad ka bor synshar district jong ka West Jaintia Hills haka 21 tarik u ‘nai Iaiong kala pynsangeh iaka jingshna ktem Pulit ka Assam ha Saba, ka shnong kaba don hajan Mukroh kiba hap ha khappud Meghalaya- Assam.

Hynrei dangshen u MLA Boithalangso LAC, West Karbi Anglong u Rupsing Teron haka 12 tarik une u bnai Jylliew ula hiar dalade ban plie paidbah ia kane ka ktem Pulit haka jingiadonlang ki dkhot jong jong ka Karbi Anglong Autonomous District Coucil (KAAC) nalor kiwei kiwei ki heh pulit ka Hamren.

Ka sorkar Assam kala plie paidbah iaka ktem Pulit ha Saba

Kane ka jingplie paidbah ia kane ka ktem pulit kala wanrah ka jingpyrshah kaba jur na kiba bun ki sengbhalang.

Ki nongialam jong kitei ki sengbhalang kila pynpaw ba kin ap ia kaei kaba mih na ka jingiakynduh ki ar district bad lada kam don kano kano ka jingseisoh kila dawa ba ka sorkar Meghalaya ruh ka dei ba kan shna noh mardor ïa ka ktem ki pulit Meghalaya mar syndah ïa ka BPO ka Assam ha Saba.

Ia ka tarik jong ka jingiakren kine ki ar district ym pat thikna, hynrei la buh ban long ha kane hi taiew.