Yn khring ka Jylla ia ki kynhun treikam shimet ka ban kynjoh shaduh ka T.8000 klur: CM

Syllad | The Rising MeghalayaMay 26, 2024

U Myntri Rangbah ka Jylla u Conrad K. Sangma u la ong ba ka Jylla ka la khmih lynti ba kan lah ban khring halor ka jingwan jong ki kynhun treikam ne kompeni shimet ka ban kot shaduh ka T.8000 klur hapoh ka Jylla.

U la ong ruh ba kane ka jingwan sengkam kaba heh kan noh synniang sha thong kumba la angnud halor ka ioh ka kot ka ban kynjoh sha ka 10 billion US dollar.

“Ka jingseng kam ha Meghalaya ka dei kaba mih lyngba ka industrial policy kaba thymmai kaba la pynsuk shibun ha kaba iadei bad ki rukom treikam trei jam,” ong u CM haba aijingkren ha ka workshop halor ka mat Human Development Leadership Programme” haka 24 tarik Jymmang, kaba la long ha Tura ha kaba la wan ban iashim bynta da ki DC, BDO bad ki ophisar na ki District bad ki Block jong ki san tylli ki district hapoh Garo Hills.

Haba kren halor ki policy kiba hashwa kim shym la pynshlur ia ki nongwan sengkam seng jam ne bei tyngka, u Sangma u la ong, “Ka rukom treikam ha ki snem kiba la leit noh ka long kaba suki bad kaba shim por shibun. Hynrei kane ka Industrial policy kaba thymmai ka jong ngi ka la plie ia ki sienjam ban aijingbit ia baroh ki jingdonkam hapoh ka por ba la buh ka ban iarap bad pynsuk shibun ia ki nonsengkam seng jam.” 

Nalor kata u la ong ruh ba haduh jan kumba T.4000 klur ka jingseng kam ki la wan urlong ha kine ki shi snem ba la dep, kata kaba kynthup ia ka T.2500 klur ka Thermail Power Plant na ka bynta ban pynmih haduh 450 megawat ka bording, ethanol plant, beverages bad ki hotel five star.

Ban pynkhlain ia ka jingpyniasoh lyngba ka IT ha ka Jylla, u Sangma u la pyntip ba ka sorkar ka la iakren bad ka kompeni telecom na Malaysia bad Bangladesh na ka bynta ka submarine cable line.

“Ka jingpyniasoh lyngba ki optical fibre kan nangpynkhlain ia k jingtreikam ha ka liang ka IT,” u la bynrap.

U CM u la pyntip ruh ba kin dang don shuh shuh ki five star hotel ki ban dang wan ha ka nongbah Shillong, Sohra bad ha Umiam, kumjuh ruh ka three star hotel ha Tura, kata baroh lyngba ki kynhun shimet. U la ong b kine ki hotel kin nangkyntiew shuh shuh ia ki kam khaii pateng bad kin plielad ruh ha ka liang ka ioh kam ioh jam na ka bynta ki samla.

“Ki Hotel ki dei ki lad pyniasoh kiba na suin, bad ki kor internet kiba sted kan pynshlur ia ki IY company ba kin buh ia ki ophis treikam hapoh kane ka Jylla.Ka Shillong IT Park ka la lah ban ai kam ia palat 3000 ngut ki samla bad bun ki kompeni kiba pynpaw ia ka jingangnud ban buh ia ki BPO ha kane ka Jylla,” u la ong haba pyntip ruh ba ha ka phase II jong ka Shillong IT Park, ka ban pynkha ia ka kam kaba haduh 3000 ngut ka dei kaba la pynthikna da ka IT kompeni napoh US bad ki ri Europe.

“Ki kompeni mynta ki la pynleit jingmut bad phai khmat na ki jaka sor kum ka Bengaluru bad Hyderabad sha ka Jylla jng ngi namar ki tip ba ngidon ia ki briew kiba tbit. Ki briew jong ngi ki dei kiba tbit bha ha ka ktien ka thylliew kumjuh kiba trei shitom kaba la nangpynioh shuh shuh ia ka kabu,” u la ong.