Yn iakhun ka 7 Wasa pyrshah ia ka Shillong Lajong ha ka jingplie ia ka Meghalaya State League

Syllad | The Rising MeghalayaOctober 11, 2024

Ka 7 Wasa United kan iakhun pyrshah ia ka Shillong Lajong ha ka jingplie ia ka lympung ialehkai phutbol 4th Meghalaya State League 2024 ka ban long ha Wahiajer Multi Sports Complex ha ka 26 tarik u Risaw, kane kalong katkum ka jingpynbeit ba la pyllait da ka Meghalaya Football Association (MFA) ha ka 10 tarik u Risaw.

Kine ki artylli ki team kiba don ha ka Group E ki ban iakhun ia baroh ki jingialehkai jong ki hapoh kane ka madan ha West Jaintia Hills. Ka 7 Wasa ka dei kaba rah ia ka nam lahduh ba nyngkong jong ka MSL ha u bnai Kyllalyngkot 2018, katba ka Lajong ka la long ka lahduh ha kaba ar ha u bnai Nohprah 2019.

Kiwei pat ki kynhun kin iakhun ia ki jingialehkai ba nyngkong jong ki ha ka 28 tarik u Risaw lait noh ia ka Group C ha Tyrsad ha kaba ka jingialehkai kan sdang ha ka 30 tarik u Risaw. Ka jingialehkai jong ka group ba khatduh kan long ha ka 7 tarik u Naiwieng 2024.

Ki don baroh hynriew tylli ki group, kawei kawei ki don sawtylli ki club na ka bynta baroh 24 tylli ki team kiba iashim bynta kiba dei ki kynhun ba shakhmat ha ki league ba la pynlong da ki seng na ki district kiba iasoh bad ka MFA.

Kawei kawei napdeng kiba jop ha ka kynhun ryngkat ki artylli ki kynhun kiba wan ha ka kyrdan kaba ar na baroh ki hynriew tylli ki group kin ioh rung sha ka quarter final. Kane ka dei ka jingkylla na ki laitylli ki jingialehkai kiba la dep, ha kaba ki nongjop jong ka kynhun kiba ioh rung beit sha ka semifinal.

Ki tarik bad ki jaka ban pynlong ia ki jingialehkai knockout yn sa pyntip kham hadien da ka MFA.

Ka Rangdajied United FC ka dei ka lahduh jong ka samoi ialehkai ba la dep hadien ba ka la lah ban pynliem noh ia ka Khliehmawlieh Youth Club ha ka final ha u snem ba la dep.

Group A (Tura) – Chipakkore FC, Atong Matgrik FC, Pinggera Do’gisik FC, Lumsohkhlur S&SC
Group B (Mawkyrwat) – Mawten SC, Khliehmawlieh YC, Riangdo Youth S&CA, Sutnga SS&CC
Group C (Tyrsad) – Mawlum Tyrsad SC, Seven United SS&CC, Ladthadlaboh SC, Nangkiew Shaphrang Lumdiengngan SC
Group D (Khliehriat) – Iatyllilang Lumsehkot FC Raliang, Mulait United FC, Rangdajied United FC, Rymbai Skhenshynriah SC
Group E (Wahiajer) – 7 Wasa United S&CC, Shillong Lajong FC, Seinbhalang Shkentalang FC, Mawtari Myrdon SC
Group F (Shillong) – Mawlai SC, Seng Samla Mawmluh, Pynursla United YC, Patharkhmah SC