Yn iaid shakhmat ka jingiakhih ka KSU bad ki rangbah shnong Narpuh halor ka jingsniew ka surok

Syllad | The Rising MeghalayaAugust 4, 2023

Ka jingiakynduh lang  kaba ar hapdeng ka KSU Narpuh Circle bad ki rangbah shnong ka thaiñ Elaka Narpuh kaba la long ha ka 3 tarik mynta u bnai ha Mynkre da kawei ka jingmut ka la rai ban iaid shakhmat ban pynlong da ka jingiakhih paidbah ha ka 08/08/2023  halor ka jingkuman bad sngap mynthi ka sorkar bad ka National Highway Authority of India (NHAI)  ban maramot ia ka surok ba la sniew palat pud hapoh u pud ka thaiñ Narpuh, kata naduh Mynkre shaduh Ratachera.

Wat hadien ba la dep ai ia ka jingthoh sha u DC ka EJHD ban dawa ia ka NHAI ban sdang maramot hapoh 7 sngi naduh ka tarik ba la aiti ia ka memorandum, hynrei haduh mynta ym i dak eiei ruh.

Ka jingialang ka la pynpaw ba ia katei ka shithi la dep phah naduh ka 26/07/2023 bad ka  jingai por ba 7 sngi ka la kut noh  ha ka 02/08/2023. Ki la ong ruh namar ym don kano kano ka jingpyni dak na ka liang ka sorkar ne NHAI, kumta kane ka la  pynbor ia ki ban shim ia ka rai ba tyngeh ban pynlong da ka jingshong surok ha surok NH-6 hapoh thaiñ Elaka Narpuh.

La ong ruh ba kane ka jingiakhih kan long da ka jingrah placard bad ki jingthoh ban pynrem jur ia ka sorkar bad ia ka NHAI. Ka jingsniew u surok kam long shuh ka sien ba nyngkong, hynrei da ki bun bun snem. Kane ka paw ka jingbym kheiñ snep ia ki paidbah jong ka thaiñ.

Ha katei ka jingiakhih paidbah da kaba mih surok yn ialum lang shi jaka, bad la kyrpad ia baroh ki kali kamai tourist bad rit bad khraw bad kiba wan nabar jylla kiba iaid lyngba kane ka surok ba kin sngewbha ai ka jingkyrshan da kaba wan iasnohkti lang ha katei ka jingiakhih da kaba sangeh shi sngi ia ki kam jong ki baroh.

La kyntu ruh ba naduh ki kali dumper kit mawshun (Limestone), ki kali sumo kamai na Lad Rymbai sha Kalaiñ Badarpur kin sngewbha ban sangeh ka kamai ha katei ka sngi. Kane ka jingiakhih ba jai jai kan long naduh ka por 10 baje mynstep haduh ka por 4 baje janmiet.

Na ka bynta kane ka sngi la pyllait noh na ka bynta ki kali kit nongpang, ki kali nongthoh khubor bad kiwei kiwei kiba don kam kyrkieh kumba ju long.