Yn dang rai ka VPP ban iatreilang bad kiwei ki seng hapoh Lok Sabha: Ardent

Syllad | The Rising MeghalayaJune 4, 2024

Ka liang pyrshah Voice of the People Party (VPP) kan dang shim ia ka rai shano kan leit ban aijingkyrshan ha Lok Sabha, kata la ka long ia ka kynhun synrop National Democratic Alliance (NDA) ba la lamkhmat da ka BJP lane ia ka INDIA Bloc.

“Kum ki nongialam jong ka party, ngin sa shong bad shim ia ka rai ha kaba iadei bad kane ka bynta,” ong u President ka VPP u Bah Ardent Miller Basaiawmoit haba kren sha ki lad pathai khubor haka sngi ba Ar hadien ba ka party jong u ka la ioh ia ka jingjop napoh Shillong Parliamentary constituency.

Da kaba pynpaw ba ka VPP kan rah ia ki mat kaba iadei bad ka bamsap hapoh Lok Sabha, u Bah Ardent u la ong, “Ngin sa buh jingkylli ia ka Sorkar India, balei ba ka khlem phah ia ka  ED (Enforcement Directorate), ne CBI (Central Bureau of Investigation) sha   Meghalaya haba ki don shibun ki jingkynnoh kiba iadei bad ki kam bamsap hapoh ka Jylla.”

Nalor ki kam bamsap, u la ong ruh ba ka party kan iakhun pyrshah ia ka jingduk bad ka jingshah leh shiliang khmat.

Kumjuh na ka liang u president ka VPP u la pynthikna ruh ba ka Seng kan buddien khlem shongthait bad ka Sorkar India halor ki mat ne ishu kiba katkum ki mat ialap ilekshon jong ka party.

Shuh shuh u la ong, “Ka ILP kan dei kawei na ki mat kaba kynthup ha ki mat ialap ilekshon jong ka party, ka Article 371 ruh ka dei kawei pat ka mat nalor bun kiwei pat. Ka party kan buddien ia baroh kine ki ishu ba la kdew ha ki mat ialap ilekshon bad ka Sorkar India.”