Yn bteng ka UDP ban pyrshah lynti rel; lah ban iashim bynta ha ka All Party Committee

Syllad | The Rising MeghalayaMay 15, 2025

U nongialam ka United Democratic Party (UDP) bad nongialam liang pyrshah ha KHADC u Bah Titosstarwell Chyne haka sngi Balang u la ong ba ka party ka lah ban iashim bynta ha ka jingialang jong ka All Party Committee hynrei kan iai bat skhem ia ka nongrim ban pyrshah ia ka jingthmu wanrah lynti rel kat bym pat don ia ki lad jingiada kiba biang ban tehlakam ia ka jingwan rung kyrthep ki briew kiba na bar sha kane ka jylla.

Haba kren sha ki lad pathai khubor, u Bah Titos u la ong, “Ban ia don bynta ha kino kino ki jingialang nga tharai ka party kan mynjur ia kane.”

“Hynrei, kum ka party ngin sa shim ia ka rai. Ngim lah ban rai tang da u president ne u secretary ha kaba iadei bad kane ka kam. La ngin ia don bynta ne em ha kane ka jingialang jong ka All Party Committee ia kane ngin sa rai ha ka jingialang ka party ka ban long ha une u taiew ban wan,” u la ong.

Nalor kata une u nongialam ka UDP u la ong ruh ba ka party ka dang bat skhem ia ka nongrim ban ieng pyrshah ia ka lynti rel kat bym pat lah ban wanrah ia ki ain kiba pyrkhing ia ka jingwan rung kyrthep jong ki briew kiba na bar sha kane ka jylla.

“Kawei na ki nongrim ba skhem kaba ka UDP ka ieng ka long ba haduh mynta mynne ngi pyrshah ia ka lynti rel namar ba ngim pat don satia ia ki kyndon ain kiba lah ban tehlakam ia ka jingwan rung kyrthep ki briew kiba na bar sha ka jylla Meghalaya. Dei na kata ka daw ngi pyrshah jur ia ka jingthmu wanrah lynti rel,” u la pynpaw.

Ai ba ki paid Jaintia kin shim rai halor ka project lynti rel ha ka thain: Kyrmen Shylla