Ai ba ki paid Jaintia kin shim rai halor ka project lynti rel ha ka thain: Kyrmen Shylla

Syllad | The Rising MeghalayaMay 15, 2025

U Myntri Sorkar uba dei ruh u MLA ka UDP na Khliehriat, u Bah Kyrmen Shylla haka sngi Balang u la ong ba u kwah ia ki paidbah ka Rilum Jaintia ba kin shim ia ka rai la ka jingtyrwa ban wanrah ia ka project lynti rel kan aijingmyntoi ne em ia ki.

“Ha nga hi shimet, nga kwah ba ki paidbah ka Rilum Jaintia kin shim ia ka rai halor ka mat kaba iadei bad ka lynti rel,” ong u Myntri haba kren sha ki lad pathai khubor.

U la ban jur ruh halor ka jingdonkam ia ka sorkar jylla ba kan pynlong ia ka public hearing ne ka jingpynsngew paidbah khnang ban ai rynsan ia ki paidbah ba kin ioh ban pynpaw ia ka jingsngew bad ki jingai jingmut halor ka jingtyrwa ban wanrah lynti rel ha East Jaintia Hills District.

“Ngi dei ban pynlong ia ka public hearing bad ai ba ki paidbah kin shim ia ka rai halor kane ka mat namar kam dei ia u Ma Kyrmen ne iano iano ruh ban shim rai. Ai ia ki paidbah ba kin rai la ka jingwanrah lynti rel kan pynmyntoi ne em ia ki bad ia ka thain,” u la bynrap.

U Myntri u la bynrap ruh da kaba ong, “Lada ki paidbah ki ong em ia ka lynti rel, kumta ruh ha kane hi ka sngi ngi dei ban pynkut noh syndon ia kane ka mat. Hynrei, lada ki paidbah ki ong hooid, balei tang ka sorkar ka dei ban kyrshan balei ki sengbhalang, balei ym baroh ki nongshong shnong?”

Haba kylli u Bah Kyrmen Shylla u la ong, “Ngi la iohsngew ia ki sur bapher bapher kumjuh ia ki jingkynthoh halor kane ka mat, hynrei uba bun paid hi un jop ha kaba kut.”

“Kumta ngin ieh beit ha ka jingshim rai jong u paidbah. Nga don ia ka jingsngew ba lada ki paidbah ki kwah shisha, ka dei ban jia. Lada ki paidbah ki pyrshah balei ba ngin pyntreikam ia ka.Kane kalong namar kaei kaei kaba ngi leh ka dei na ka bynta u paidbah. Ngi dei ki shakri paidbah bad kum ki shakri paidbah ka dei ka kamram ka jong ngi ban pynbiang ia ki jingdonkam jong ki bad ngim dei ban iaid lait ia ka mon ka jong ki,” u la ong.