Ym treikam ka bai kit dewbilat thymmai da ka jingiakhih khlem buh por pynbna ka JAC

Syllad | The Rising MeghalayaNovember 2, 2020

Ka Joint Action Committee (JAC) ka la rai ban pynlong da ka jingiakhih kaba khlem buh por ‘Indefinite Strike’ ka ban sdang naduh ka 5 tarik une u bnai.

Ïa kane ka rai ka JAC kaba kynthup ïaka Jaintia Hills Truck Owner Association (JHTOA), All Jaintia Hills Clinkers and Cement Association (AJHCCA) bad ka Meghalaya Truckers Union (MTU) ka la shim haka General Meeting kaba la long mynta ka sngi ha Phramer, West Jaintia Hills District.

Ka JAC da kawei ka sur ka la rai ban pynlong da ka jingïakhih kaba khlem buh por halor ka jingbym pyntreikam ki karkhana khyndew bilat ïaka dor thymmai ba la buh da ka tnat Transport jong ka sorkar Jylla.

Ka dor ba la pynmih da ka sorkar Jylla haka 25 tarik Nailur (September) 2020 lyngba ka Notification NO.TPT.91/80/813 ka la pynthymmai ïaka dor bai kit mar ki trok kata T.7 haduh T.11 shi kilometre shi ton ha ki surok rong, T.8 haduh T. 12 shi ton shi kilometre haki surok maw bad T. 10 haduh T. 12 shi ton shi kilometre ha ki surok khyndew.

Kumban shu pynkynmaw ka JAC ka ka dep buh jingthoh sha u Deputy Commissioner ka East Jantia Hills District haka 20 tarik Risaw (October) bad ka ka liang u DC ula pynmih iaka hukum (Order) lyngba ka shithi EJHD/GEN/TRAN-4/Vol-IV/2019/169 kaba la pynmih haka 25 tarik Risaw (October) uba la bthah ia ki Cement Factories ban pyntrei kam noh iaka dor ba la buh daka sorkar.

Ka JAC hadien kane ka la iohi ba na ka liang ki Cement Factories kim shym la pyntreikam ia kane ka dor bad kala rai ban iakhih paidbah ban sdang da Indefinite Strike bad khang iaki kharkhana dewbilat kit dewbilat bad kiwei ki mar kiba pynmih ki kharkhana dewbilat.

Ka JAC kala kyrpad iaki trai trok nongniah trok ban ai jingkyrshan halor kane ka jingiakhih.