Ym don jingmut ban vote ia ka Congress, long kumba shong ha ka lieng kaba ngam: Shangpliang

Syllad | The Rising MeghalayaApril 5, 2024

U Nongaiktien ka National People’s Party (NPP) u Bah Himalaya M Shangpliang haka 4 tarik Iaiong u la ong ba ka jingai jingkyrshan bad vote ia ka Congress ka long kumba shong ha ka lieng kaba ngam.

U Bah Shangpliang u la pynpaw ia kane kum ka jingkynthoh kylla ia u nongialam ka Seng Congress uba dei u MP ba mynta u Bah Vincent H Pala halor ka jingkynnoh ba ki paidbah kin shu tih iala ki jong ki thliew jingtep lada ki ai ka jingkyrshan bad vote ia ka NPP namar ka dei tang ka syrngiew jong ka BJP.

“Mano ba kwah ban shong ha ka lieng kaba ngam? Ha ka jaka ban vote ia ka Congress, kan kham bha ia ki paidbah ba kin vote ia ka NPP ka ban pynthikna halor ka jingwan jong ki kam pynroi sha ka jylla Meghalaya,” ong u Bah Hima.

Nalor kata u pynkynmaw ruh ba ka NPP ka dei ka paralok jong ka kynhun synrop NDA ba la ialam da ka BJP hapoh ka sorkar pdeng naduh ka por jong u (L) Purno Agitok Sangma bad u Myntri Rangbahduh Atal Bihari Vajpayee.

“Kam dei satia ka kynhun synrop kaba dang shen hynrei kane ka kynhun synrop ka la don naduh ka por jong u (L) PA Sangma uba la iakhun ruh ia ka ilekshon na ka bynta ka kam President jong ka Ri India,” u la ong.Nalor kata u la ong ruh ba ka Congress kam don satia ia ka lawei hapoh ka Jylla ne ha ka sorkar Pdeng.

“Kan long ka bym don jingmut ia ki paidbah ba kin kyrshan biang ia ka Congress namar ka bainong ka long ban hap shong biang ha ka liang pyrshah.Dei na kata ka daw ki paidbah ki dei ban kyrshan ia ka kyrtong ka NPP ka Kong Ampareen Lyngdoh khnang ba kan lah ban wanrah ia shibun ki kam pynroi ia ka thain Rilum Khasi Jaintia bad ia ki paidbah nongshong shnong,” u la bynrap.

Kumjuh u Bah Shangpliang u la kynnoh ruh ba ki paidbah ki la bteng ban nang iai mih na ka party Congress man la ka sngi.

“Kiba bun ki la wan ban pyniasoh sha ka NPP hashwa ba ka lieng jong ka Congress kan ngam jyllop bad ngi khmih lynti ba kin dang don bun shuh shuh ki nongtrei ka Congress ki ban wan pyniasoh sha ka NPP ha kine ki khyndiat sngi ki ban dang wan,” ong une u nongaiktien ka NPP.

Katkum ka jingong ka jong u, ki don arngut ki MDC ba mynta ka seng Congress ha ryngkat ki spah ngut ki nongtrei na kylleng ka Jylla kiba la mih noh na kane ka party bad wan pyniasoh sha ka NPP.