Ym don doktor bad jot rathai ka Umkiang PHC, ujor ka bor shnong sha ka tnad ka koit ka khiah

Syllad | The Rising MeghalayaJune 17, 2021

Ka Umkiang PHC kaba dei tang maka na ki jaka sumar kaba shakri ia bun tylli ki shnong ha Khappud Assam bad Bangladesh, phewse kane ka jaka sumar kala neh kumjuh khlem kino kino ki jingkylla la bun bun snem bad ka dap da ki jingduna naduh ki jingtei bad ki dawai dashin bad mynta ka kynti kam don doktor.

Ia kane ka jaka sumar la peit mynta tang da I doktor Ayurveda bad ka bor shnong Umkiang kala pynher na ka jingthoh haka sngi Palei sha u Myntri ka tnad ka Koit ka khiah ka Jylla, Secretary ka Koit ka khiah, Director DHS (MI), u Deputy Commissioner Jaintia Hills District nalor u DMHO ka District.

“Ia kane ka jingduna bad ki jingeh ka PHC Umkiang ngi la dep ujor la bun bun sien, hynrei ka tnad ka koit ka khiah kala leh bymsuidniew ban pynbiang iaki jingdonkam ka PHC,” la ong u kyrwoh na u Assistant Waheh Shnong ka Umkiang u ma Kynjaimon Amse.

“Kane ka PHC kala jot rathai bad kiba bun ki kamra thiah bad ki kam trei jong ki nongtrei bad doktor ka PHC kila jaw um lut. Ki jingthiah jong ki nongpang la lap ba kila jot lut ki tusok bad kala donkam kyrkieh ban maramot ia kane ka PHC,” ong u ma Kynjai.

Ula ong “Wat tang ka dawai formalin ban ai injek ia kiba iap ruh kane ka hospital kam don bad ka buh jingeh iaki nongshong shnong ban kit iaka metiap sha ki shnong ba jngai ha katei ka thain.”

Ka bor shnong kala kyrpad jur ia ka sorkar ban phaikhmat sha katei ka jaka sumar ban maramot iaka iing bad kumjuh ban thung ia u doktor MBBS katba lah kloi khnang baka jingdon kane ka jaka sumar kan pynmyntoi ia u paidbah jong ki 16 shnong kaba ka jingbun briew kala kot palat iaka 15000.

Ka shithi kaba la phah sha ka tnad ka koit ka khiah la dawa ruh ban kyntiew kyrdan ia kane ka PHC sha ka CHC bad ban thung pynbun iaki nongtrei khnang ba kane ka ka jaka sumar kan ai ka jingshakri kaba bha ia u paidbah ka thain.