Ym don ba iabit pang COVID-19 ha iew CNI Jowai

Syllad | The Rising MeghalayaJuly 26, 2020

Ka Dorbar Shnong Tympang Iawmusiang kala pyntip paidbah ba kam don kano kano ka jingiabit pang khlam COVID-19 ha iew CNI, ha Jowai.

Ka bor shnong Iawmusiang kala pynthikna ia kane na CNI Market Committee bad la ong ba kane ka dei tang ka khubor hamsaia ha kaba iadei bad ka longkmie kaba die pylleng ha katei ka iew.

“Kane ka khubor kam long kaba shisha kadei tang ka hamsaia bad la kyrpad iaki paidbah ba kim dei ban ngeit bad pynsaphriang klumar iaki khubor bym shisha kum ha kine ki por ba ka shnong ka thaw ka don haka saw ka sain na ka jingiakhun iaka khlam COVID-19. Kane ka longkmie kaba die pylleng ka khie tlot na ka jingpang BP bad kam don kino kino ki dak ki shin bad ka khlam COVID,” ong ka Dorbar Shnong Tympang Iawmusiang.

Ka Dorbar Shnong Iawmusiang kala kyntu iaki paidbah ba kim dei ban tieng ne her syrngiew halor kane ka khubor bad la kyntu iaki paidbah ba haba leit iew leit hat ban bud iaki kyndon kiba la bthah ka tnad ka koit ka khiah namar ban ieng khampajih bad ban deng iaki mask haba leit haki jaka paidbah bad ban sait khuid iaki kti ban iada na ka khlam Coronavirus.