Weng noh ki nonghikai SSA ia ka jingiakhih hadien ba pynthikna pynkiew tulop ka Sorkar

Syllad | The Rising MeghalayaOctober 21, 2024

Ki nonghikai skul SSA hapoh ka shatri jong ka All Meghalaya SSA School Teachers Association (AMSSASTA) haka 21 tarik u Risaw ki la weng noh shwa ia ka jingiakhih shong kyllain mungor ba 21 sngi jong ki hadien ba ka Sorkar Jylla ka la pynthikna ban pynkiew noh ia ka tulop jong ki.

Ia kane la pynbna da u president ka AMSSASTA u Bah Peter Thyrniang hadien ka jingiakynduh ia ka Myntri Sorkar kaba dei ruh ka nongaiktien ka Sorkar MDA ka Kong Ampareen Lyngdoh ha ryngkat ki heh ka Tnad pule puthi.

Haba kren sha ki lad pathai khubor u President ka Association u la ong, “Ngi la shim ia ka rai ban pynsangeh shwa ia ka jingiakhih jong ngi hadien ba ka Sorkar Jylla ka la mynjur ia ka jingdawa ka jong ngi ha kaba iadei bad ka jingpynkiew tulop. Na ka liang ka Myntri ka la pynthikna ba ka Sorkar kan sa shim rai ha kine ki khyndiat bnai ki ban wan.”

Hynrei, namar ka jingtreikam jong ka Model Code of Conduct (MCC) namar ka elekshon shiteng samoi ha Gambegre constituency, kumta ruh u la ong ba na ka liang ka Myntri ka pyntip ba ka Sorkar kam lah ban pynbna lano bad haduh katno yn pynkiew ia ka tulop jong ki nonghikai SSA.

Haba kylli u Bah Thyrniang u la ong, “Ka ka Association ka ieng skhem ha ka nongrim ka jingdawa pynkiew tulop kaba 100% da kaba kdew ba ka jingpynkiew tulop kaba khatduh eh ka dei naduh ki phra snem kiba la dep, kata ha u 2016.”

Katkum ka jingpynpaw ka jong u, u la ong ba ki nonghikai skul Lower Primary School mynta ki ioh tulop tang T.19,994 katba ki nonghikai Upper Primary ki ioh T.20,493.

Nalor kane une u president ka Association u pyntip ba ka Seng ka la shim ruh ia ka rai ban pynsangeh noh ia ka rally ba thmu ban pynlong ha ka 23 tarik mynta u bnai namar kane ka rai kaba thymmai.