Weng ka synjuk waheh chnong Jowai iaka rai sangeh iatreilang bad ka bor synshar district

Syllad | The Rising MeghalayaAugust 16, 2021

U secretary jong ka synjuk waheh chnong Jowai, u ma Riquoma RQ Laloo, ula pyntip ba nakaliang ka synjuk waheh chnong Jowai bad ka bor synshar district jong ka West Jaintia Hills district kila poi sha ka jingiakren sngewthuh jingmut haka jingialang kaba long haka 15 tarik ha Circuit House Jowai.

Ha kane ka jingialang hadien bala poi sha ka jingiakren sngewthuh jingmut la rai ban buddien iaki skim pynroi pynpar iaka sor Jowai bad ka district baroh kawei. Ha kaba iadei bad ka kam bret ñiut ka Jowai la banjur iaka sorkar ban pynkloi ban wad ki lad ki lynti ban pynjem ia kane ka jingeh.

Shuh shuh ha kaba iadei bad ka rally kaba la thmu ban pynlong lashai ka sngi 17 tarik Nailar (August) ruh la pynsangeh noh hadien kane ka jingialang.

Ka synjuk waheh chnong Jowai kala pynbna ba kala weng mardor iaka rai bad kan ai ka jingiatreilang bad ka bor synshar district kumba ju long khamtam ha kaba iadei bad ka jingpang khlam COVID-19. Ka synjuk kala pynbna ba kan nym shong kli kti ban kan iai buddien iaki kam pynroi ba ka Jowai ka dei hok ban ioh.

Ka synjuk kala khot wer ia baroh ki synjuk waheh chnong hapoh ka rilum Jaintia ban iatrelang da kawei ka sur ban wanrah iaka roi ka par ha baroh ki shnong ki thaw khamtam ban pynlong iaka iitkhmih ka district kaba khuid kaba suba.