Wat siew bai toll gate ha Pasyih Ialong tad haduh bala dep kren pynbeit ong ka JSM AJTCVA

Syllad | The Rising MeghalayaJanuary 20, 2022

Ka bor synshar district West Jaintia Hills kala khot iakren iaka All Jaintia Tourist Commercial Vehicle Association (AJTCVA), Jaintia Students’ Movement (JSM) bad ka NHAI halor ka bai toll gate ha Pasyih Ialong, hynrei kane ka jingialang kam shym la poi shaei shaei haka sngi Balang.

Kane ka jingialang ka dei halor ban pyllait iaki kali ban siew bai toll gate, kaba hadien bala pyntreikam iaka FASTag baroh ki kali ki hap ban siew naka T.30 sha ka T.60 kum ka kunai ia ki kali bym don FASTag.

Kane kala wanrah ka jingpyrshah kaba jur na kaliang ki nongniah kali kamai ba ktah iaka jinglut jingsep jongki bad ka NHAI ruh ka pyneh triang namar ba ka duhnong namar ka jingbymsiew ki kali iaka bai toll gate.

U Ribok Biam, president JSM Western Region bad u Paila Lyngkot president AJTCVA hadien ka jingialang kila ong baka jingialang kam shym la poi sha ei sha ei bad kila ong ia baroh ki kali kamai kumjuh ki kali shimet kim dei ban siew bai toll gate tad haduh bala pynbeit ia kane ka kam.

Ka JSM bad AJTCVA kila buh jingkylli ruh ba sha kiwei ki jaka la don ka jingpynjynsur halor ka jingsiew bai toll gate iaki trai shnong, katba ha West Jaintia Hills ka NHAI kala lum khajna salonsar ia baroh khlem don jingmap.