Wat pynkynriah ïa u BDO Laskein u ba ïeng ïasaid ïa ka kam khajia pud

Syllad | The Rising MeghalayaOctober 31, 2019

JOWAI: Ka Synjuk Waheh Shnong Ri Jaiñtia, Laskeiñ Unit kala dawa na u Myntri ka tnad C&RD jong ka sorkar Jylla ban pynsangeh ïaka jingthmu pynkynriah kam ïa u BDO Laskeiñ C&RD Block namar ba u dei u ophisar uba shlur ban ïasaid halor ka ishu ïakhajia pud bad ka Assam.

Ka Synjuk Waheh Shnong Ri Jaiñtia kala ai da ka dorkhat sha u Myntri ban dawa na u ban pynsangeh ïa ka jingpynkynriah kam ïa u BDO Laskein u Bah Ferdinand Basan namar ba hapoh ki kyndiat por ba ula trei ha katei ka Block ula lah ban pyni shisha ïaka jingshemphang jong u ban trei kaba wanrah jingmyntoi ia u paidbah katei ka Block kaba rim bad kaba heh u pud  ang.

U President Loving Laloo bad General Secretary u Niewbiang Ting jong ka Synjuk Waheh Shnong Ri Jaiñtia haka dorkhat kaba kila phah sha u Myntri ka tnad C&RD bad la phah ruh sha u MLA ka Raliang bad u MLA ka Mowkaiaw kila pynpaw ba kham niar ba ka Block Laskein kan ioh BDO uba don ïaka kyrdan MCS bad kila pynpaw ba ha kine ki kyndiat por ba ula trei ula pyni ïaka jingshemphang jong u ban trei bad bun ki shnong kila ioh jingmyntoi.

“Une u ophisar udei u ophisar udei u briew u ba shlur ha kaban ïasaid bad ophisar jong ka sorkar Assam halor ka jingïakhajia pud bad bunsien ula pyndem tdong ïaki haka jingwan shna ktem pulit ha ki jaka ba iakhajia ba shong ba sah ki Pnar. Ngi donkam ïa une u ophisar uba trei shitom bad uba ieng haka nongrim ban wanrah jingkylla ïaka Block Laskeiñ,” la ong ki nongialam Synjuk Waheh Shnong Ri Jaiñtia, Laskein bad bynrap ba lada pynkynriah ïa une u ophisar na Laskein kan long ka jingduh nong kaba khraw ia u paidbah ka thain baroh kawei.