Wan jurip u James Sangma iaka jaka shna soh pailen ban pynkhie im Wah Lukha

Syllad | The Rising MeghalayaJune 30, 2021

U Myntri ba dei khmih iaka tnad Forest and Environment James K Sangma haka sngi Balang ula wan hiar dalade sha Wah Lukha ban jurip iaka pung um shna soh pailen ban pynkhie im biang iaka wah Lukha, ka wah kaba la iap naka um acid ba mih naka jingtih mar pohkhyndew.

Ha kane ka jingjurip u James K Sangma iaka project pynkhie im iaka Wah Lukha la synranlang ki ophisar ka tnad kam khlaw.

“Ka Wah Lukha kadei ka wah kaba la kyrkhu ia kiba bun kiba la shaniah ha ka, hynrei kumba phi iatiplang baroh ba ka jingtuid ki um acid kala pynjulor ne pynlong ia kane ka wah ban iap bad kam don jingim shuh bad kylla rong, kumta na kaliang ka tnad ka kam khlaw ka sorkar kala shimkhia ban pynkhie im ia Wah Lukha,” la ong u James K Sangma.

U James ula ong ba “Na ka por sha ka por ngi la ia phylliew jingmut bad ki riewshemphang na ri United States bad Israel kiba wad bniah halor ki jingthung ban pynkhie im ia ki um ki wah ne ban pynkhuid iaka um acid haka wah.”

“Mynta la thung iaki jingthung phytoremediation ne ki soh pailen ki ban kjit iaka jakhlia bad ban pynkhuid iaka um ka wah kum ka jingpyrshang bad ki dak ki shin ki long kiba bha bad ngi lah ban pynheh iaka projek bad ban pyrshang ha kiwei kiwei ki wah, kiba jur ka um acid.” la ong u James.

U James ula khot ia baroh kiba don bynta bad ki nongialam shnong ban wan shakhmat ban iarap iaka sorkar ha kane ka projek ban pynkhie im iaki um ki wah.

Shuh shuh u James ula ong ba ki kharkhana ruh ki dei ban bud ryntih iaki kyndon iada mariang. “Ka jingkylla ka mariang ne ka Climate Change ka dei kaba shisha, kumta ka por kala dei eh ban ba kino kino ki kam kiba iadei bad ka ioh ka kot ki dei ban iaid ryngkat bad ka jingpynbha iaka mariang.”

Kane ka projek ka dei lyngba District Mineral Fund Trust Committee kaba la pyntrei da ka Trinity Impex International, Delhi haka dor T.2.5 klur.

U Secretary 6 Shnong Wah Lukha Association u Ma Daiapherbha Lamare ula ong ba kila ai iaka dorkhat ban pynioh pisa shuh shuh lyngba ka Meghalaya Environment Restoration and Protection Fund (MERPF) ban pynbha iaka wah Lukha.