Wan jurip ka MSPCB ia ka Abhi Coke hadien ka jingdawa pynkynriah naka SEPSD

Syllad | The Rising MeghalayaJune 19, 2019

JOWAI: Ka Meghalaya State Pollution Control Board (MSPCB) kala wan ban jurip iaka kharkhana shna rnga dewiong-ka Abhi Coke, kaba don ha rud u surok bah NH-6, ha ka shnong Mookhep, East Jaiñtia Hills District haka 18 tarik une u bnai hadien ba ka Society for Environment Protection and Sustainable Protection (SEPSD) kala ai ka jingujor  Jymmang 14 sha ka MSPCB bad sha u Myntri ba dei peit ia ka tnat ka koit ka khiah ban dawa pynkynriah noh sha kiwei ki jaka.

Ha katei ka jingjurip jong ka MSPCB kaba la wan u Assistant Environment Engineer  MSPCB, u Bah S Syiem, ki dkhot ka SEPSD haka jingialam u Joint Secretary SEPSD u samla Diamond Dhar, ryngkat ki waheh shnong ka Khliehmyntriang u Ma J Dkhar, u Ma H.Phawa Waheh Shnong Jalyiah bad kiwei.

Naka liang ka MSPCB kala ong ba hap ban leh ïaka test, khnang ban lap laka lyer ne haw ka shah ktah na ka tdem ba mih na ka kharkhana. Kane ka kharkhana ka pynmih ruh ïaka jingsma iwtung na ki jaboh ba mih na kane ka kharkhana, kaba la kynnoh ba ka ktah ia ka koit ka khiah jong ki nongshnong shnong, ki nongleit nongwan bad ia ki khynnah jong kawei ka skul kaba don hajan kane ka kharkhana.

Hynrei ha katei ka sngi naka daw jong ka jingbym biang jong ka jinglong jong ka suiñ bneng ym lah ban leh ia ka Air Testing, kumta na ka liang ka MSPCB kan leh ia kane ka test ha kawei pat ka sngi.

Na ka liang u nongialam kane ka society u D Dhar u la ong ba kin ap haduh ka sngi ba ka MSPCB kan leh ia ka test bad hadien ba la ioh ia ka resol, ka SEPSD bad lada lap ba katei ka kharkhana ba pynjakhlia iaka lyer kan shim ki rai kiba tyngeh kiba iadei bad ka aiñ iada mariang.

La kyntu ia u myntri ka koit ka khaih ban shimkhia ia kane ka kam, na ka bynta ban pynkynriah ia kane ka kharkhana sha kawei pat ka jaka ba iadei bad ki kharkhana  kaba jngai naki shnong ki thaw.