Wan jngoh u Myntri Rangbah iaka rilum Jaiñtia ban shim jingkhein halor ka khlam COVID-19, shen yn pyndep noh iaki ar tylli ki Oxygen Plant

Syllad | The Rising MeghalayaJune 11, 2021

U Myntri Rangbah ka Jylla u Conrad K Sangma ula wan jngoh iaka Rilum Jaintia haka sngi Thohdieng ban shim jingkhein halor ka jinglong jingman ka khlam COVID-19 ha ki ar tylli ki District, ka East bad West Jaintia Hills District.

Ka West Jaintia Hills District ka dei kaba jur ka jingiabit khlam COVID-19 bad man ka sngi katkum ka report ka tnad ka koit ka khiah ki don ki briew kiba iap na ka jingpang khlam.

Ka West Jaintia Hills haduh bala thoh iaka khubor ki briew kiba iabit khlam thymmai ki don haduh 71 ngut bad kiba dang shitom ne active cases 644 ngut bad ba khlad i wei. Ka East Jaintia Hills District ka don 143 ngut ki active cases.

Khlad sa 10 ngut, kynjoh ka jingiap khlam COVID-19 sha ka 714 ngut

Halor kane ka jingkiew ka jingiabit khlam ha rilum Jaintia u Myntri Rangbah dalade ula ban shim jingkhein halor ka jingpynkhreh.

U Conrad ula iathuh ba ka sorkar kala pynkhreh ban pynbiang iaki jaka test bad ka jingdonkam ki jaka sumar ha baroh ar district.

Ha kaba iadei bad ka 150 LPM Oxygen Plant ha Jowai bad 300 LPM Oxygen Plant na ka bynta ka Khliehriat yn pyndep noh shen hapoh kine ki 10 sngi.

Ula ban jur ia kine ki ar tylli ki bor synshar district ban nym pynslem ban ai pass ban kit ia ki mar rep mariang bad ban buh thong ban ai tika COVID-19 iaki nongniah trok.

Shuh shuh u Myntri Rangbah ula ban jur iaka tnad ka koit ka khiah ban shimkhia ban ai tika ia ki briew kiba lah ban shah ktah haka jingpang COVID-19.