Wan iuhkjat ka Myntri ka Sorkar Pdeng ha Ri Bhoi, bishar halor ki shim ba dei ia ki longkmie bad khynnah

Syllad | The Rising MeghalayaDecember 1, 2024

Ka Myntri ka Sorkar Pdeng kaba khmih ia ka Tnad Women and Child Development, ka Annapurna Devi ha ka 30 tarik Naiwieng ka la leit jngoh ia ka Ri Bhoi District ban bishar bniah halor ka jingpyntreikam ia ki skhim bapher bapher bapher ka Sorkar Pdeng kiba iadei na ka bynta ka bha ka miat jong ki longkmie bad ki khunlung khynnah.

Shibynta jong kane ka jingwan jurip, ka Myntri ka la sdang da kaba leit jurip ia ki katto katne tylli ki shnong hapoh ka district ha kaba ka la iakren ruh bad ki longiing hapoh Transit Home kumjuh bad ki longkmie armet hapoh Primary Health Centre ha Byrnihat.

Ka Myntri ka la leit jngoh ruh ia ka Anganwadi Centre ha ka shnong Saiden ha kaba ka la iakren bad ki nongkhmih jong ka centre kumjuh bad ki khynnah pule ha ka pre-school bad halor ki kam ba iadei bad ka Supplemental Nutrition Programme (SNP). Hadien ka la khmih bniah halor ka jingpyntreikam ia ki skhim bad iakynduh ruh ia ki nongmihkhmat jong baroh ki tnad kumjuh ki bor pyniaid district hapoh DC Conference Hall ban bishar bniah halor ka jingpyntreikam ia ki skhim ba la pynioh da ka Sorkar Pdeng.

Ha ka jingialang iamir jingmut la iakren halor ki jingeh, ki jingjop bad ki jingiaid shaphrang ha ki jingtreikam nalor ka jingmang tyngka bad ka jingpyndonkam ia ka pisa na ka NITI Aayog bad ka North Eastern Council (NEC) lem bad kiwei pat ki skhim bad ki sienjam ba la shim.

Ka Myntri ka la iaroh ruh ia ki sienjam ba la shim da ka sorkar Jylla, kynthup halor ka Early Childhood Development Mission bad ka Chief Minister’s Safe Motherhood Scheme (CM-SMS), da kaba ong, “Kane ka sienjam ba la shim da ka sorkar ka dei kawei na rukom treikam kiba biang tam bad ngin khmih kumno ban lah ban pyntreikam ia kane ha kiwei pat ki aspirational district jong ka ri khnang ban lah ban kyntiew ha ka liang ka koit ka khiah jong ki longkmie bad ki khunlung jong ki.”

Nalor kata ka Annapurna ka la pynpaw ruh ka jingsngewhun halor ki jingjop jong ka district da kaba ong, “Ki jingpynpaw jong ka Ri Bhoi Aspirational District ki long kiba ai mynsiem shibun. Mynta ka district ka don ha ka kyrdan kaba halor ha kaba iadei bad ka jingshakri na ka bynta ki longkmie bad ki khunlung khynnah da kaba kular ruh ban weng ia ki jingeh jingduna ha ki katto katne ki bynta ia kiba la pynsngew ha ka jingialang.”

Haba kren halor ka jingphaikhmat jong ka Sorkar Pdeng ha kaba iadei bad ka thain Shatei Lammihngi hapoh ka jingialam jong u Myntri Rangbahduh ka ri u Narendra Modi, ka Myntri kala ong, “Mynta u PM Modi u la phaikhmat bha sha kane ka thain shatei Lammihngi, bad ka la don ruh ka jingiatreilang da baroh ki tnad kynthup ka tnad Women bad Child Development.”

Kiwei pat ki heh sorkar na ka sorkar Jylla kiba la ia don lang ha kane ka jingleit jurip jong katei ka Myntri ka Sorkar Pdeng ki kynthup ia u Sampath Kumar Principal Secretary ka tnad ka koit ka khiah ka jylla, u Pravin Bakshi, Commissioner & Secretary ka tnad Social Welfare ka jylla,  u Abhilash Baranwal Deputy Commissioner Ri Bhoi, ki heh ophisar ka sorkar pdeng nalor kiwei kiwei.