Ujor u nongtrei kam bhalang pyrshah ia ki 2 ngut kiba shna death certificate thok

Syllad | The Rising MeghalayaNovember 26, 2024

U nongtrei kam bhalang u Greneth M Sangma ha ka 25 tarik Naiwieng u la phah da ka jingujor sha u Deputy Commissioner ka North Garo Hills halor ka jingkynnoh shna thok ia ka syrnot iap ne ‘Death Certificate’ da u Secretary ka VEC u Jewilson Sangma na Chorelbolbok bad u Laston Momin uba dei u Sorkar jong ka shnong kaba hap hapoh Bajengdoba police station.

Ha katei ka shithi, u Sangma u iathuh ruh ba ia katei ka syrnot iap kaba thok la pyndonkam ban sei ia ka bai bylla jong u Rilipson Marak, uba dang im bad uba trei mynta sha Chennai.

U la ong ba katkum ka khubor, ka kurim jong u Rilipson Marak ka la pynpaw ba u kurim jong ka u trei bad kamai bylla lyngba ka Job Card jong u shwa ban leit sha Chennai, da kaba bynrap ba kane ka pyni shai ba kane ka syrnot iap ka dei kaba shu shna thok bad ki briew kiba donkti ki la leh ia ka kam bymman kaba shyrkhei.

“Kumta, sa shisien nga kyrpad jur ia phi ba phin sngewbha ban peit bniah ia kane ka kam bad nga dawa jur ba dei ban mudui mardor da ka ejahar pyrshah ia u Jewilson Sangma bad u Lastone Momin katkum ki kyndon ba dei jong ka ain halor ka jingshna bad pyndonkam da ki kot ba shu shna thok. Nga kyrpad ruh ba dei ban shim ia ki sienjam kiba donkam ban kem ia ki nongshah kynnoh bad ban pynioh ia ka jingbishar hok na ka bynta u lanot,”u la pynpaw ha ka shithi.