Ujor u kñi jong u Kynjaimon Amse ba suba jur halor ka jingiap aksiden

Syllad | The Rising MeghalayaAugust 28, 2024

U Bah Lalan S Amse na Umkiang East Jaintia Hills uba dei u kñi jong u (L) Kynjaimon Amse 31 snem rta uba la khlad na ka jingjia tyngkhuh kali ba dang shen, ha ka 26 tarik Nailar u la leit ban ujor da ka ejahar sha u Officer In-Charge Khliehriat Police Station halor ka jingsuba jur halor kane ka jingiap u pyrsa jong u.

Ha ka jingujor u Bah Lalan u la ong ba ha ka 23 Nailar ha ka por kumba 2 baje mynstep, u la ioh pdiang ia ka phone call na uwei u briew uba kyrteng u Suni Pdang uba la iathuh ba u pyrsa jong u, u Kynjaimon Amse u la ngat ha ka jingjia tyngkhuh kali ha ka shnong Dkhiah, East Jaintia Hills District.

U la ong ruh ba ia ka kali kaba don ia u nombor ML 11 9405 la niah da u Fullmon Nongtdu uba dei na Khliehriat EJH, ha ka jingiadon lang jong ki arngut kiwei pat kiba kynthup ia u Raja L Suchen bad u Small Lamin kiba dei na ka shnong Huroi katba ki dang wan na  Ladrymbai.

“Ha kane ka jingjia u pyrsa jong nga, u (L) Kynjaimon Amse u la khlad hashen, hynrei Ngam sngew lah ngeit ba ka jingiap ka jong u ka dei na ka daw jong ka jingaksiden namar ka don kaei kaei kaba pynsuba namar ka jinglong jingman jong ka kali sha ka liang kaba u shong kam don dak julor khyndiat ruh, bad ka jingjulor ka long tang malu mala,” ong u Bah Lalan.

Kumta na ka liang u Bah Lalan u kyrpad ia ki pulit ban register case halor kane ka jingjia bad ban pynlong ia ka jingtohkit kaba bniah khnang ban lap ia ki jingshisha baroh.

Lah ban kdew ba u Bah Kynjaimon Amse uba dei u nongtrei mon sngewbha bad nongiasaid ain uba ju kit ia ka khia ka shon jong ki paidbah u la khlad kyndit ha ka jingjia tyngkhuh kali kaba la jia ha ka step phyrngab jong ka 23 tarik Nailar ha ka shnong Dkhiah, EJH.