Ujor FIR ka shnong Umkiang ia u officer ka tnad kam khlaw kynnoh bamsap na ki trok kit mawshun

Syllad | The Rising MeghalayaDecember 20, 2021

Ka long lehse ka sien kaba nyngkong ba ka Dorbar Shnong ha Rilum Khasi Jaintia ba kan ieng pyrshah ia ki kam beaiñ kiba la leh da ki ophisar sorkar hapoh u pud u sam jong ka da kaba ujor shi syndon da ka ejahar (FIR) hapoh ka tnat pulit khnang ban ioh pynshitom ia utei u lang iong jong ka sorkar katkum ki kyndon ain jong ka Ri India.

Mynta ka sngi u Waheh Shnong Umkiang jong ka Dorbar Shnong Umkiang kaba don ha East Jaintia Hills District u Ma Lasting Pala ula leit ai da ka FIR pyrshah ia u Range Officer, ka Umkiang Range u Ma Samdakiyo Shullai ha ka Umkiang Patrol Post kaba hapoh Lumshnong Police Station.

Ha katei ka jingujor, U Ma Pala u la kynnoh ba u Shullai u ju pyllait pathar iaki trok kiba kit palat pud ia u mawshun bad shim pisa beaiñ. La kynnoh shuh shuh ba une ophisar ula shim pisa na ki trok kit overload kynthup ia ki bym biang kot sla.U la ong shuh shuh ba kila lap ia kane ka kam beaiñ man la ka por bad namar ka jingbam pisa une u ophisar ki trok kiba kit tam palat iaka jingkhia kaba ki dei ban kit kila lait ban iaid na khmat ka ophis ne check point jong u bad kine ki trok ki iaid sahuh ha surok bah.

Kane ka jingleh une u ophisar ym tang baka long beaiñ, hynrei ka pynsniew ruh iaka surok bah.

Mynta ka sngi ruh ka bor shnong kala bat 9 tylli ki trok kiba don ia u registration number AS 11 DC 9466, ML 04 C 4968, ML 11 1607, ML 04 C 6923, NL 01 AE 8608, TR 01 AP 1620, AS 11 DC 9534, ML 11 6152 bad ML 11 8277, la ong u waheh shnong Umkiang.

Ka bor shnong kala kyrpad iaki pulit ka Umkiang Patrolling  Post ban pynshitom ia une u ophisar katkum ki kyndon jong ka aiñ.

Une u Mawshun udei uba wan na ki par mawshun na Lumshnong bad kiwei kiwei ki shnong ba marjan bad shalan sha Assam.

Ka tnad kam khlaw (Territorial Division) ka don ka bynta kaba khraw ban tem iaka jingkhaii beaiñ kumjuh ban buh jingkhein katkum ka kyndon jong ka Meghalaya Minor Mineral Concession Rules 2016 ban lait ka khajna ban lait na ka pla sorkar.