Ujor ejahar u MDC barim pyrshah ia u president ka VPP halor ka jyrsieh thied jaka ka KHADC
U MDC barim ka Umsning u Bah Donkupar Sumer ha ka 17 tarik Iaiong, u la ujor da ka ejahar pyrshah ia u president ka liang pyrshah Voice of the People Party (VPP) uba dei ruh u MLA ka Nongkrem, u Ardent Miller Basaiawmoit halor ka jingkynnoh donkti ha ka jyrsieh thied jaka ha ka por ba u dang bat kum u Chief Executive Member (CEM) jong ka Khasi Hills Autonomous District Council.
Katkum kane ka ejahar ba la ujor hapoh Lumdiengjri police station, u Bah Sumer u la ong, “U Bah Ardent u la leh ia ka kam tuh, kam thok, soi tuh bad bamklop ia ka pisa jong jong ka Council ha ka por ba u dang bat kum u CEM ha ka kyrteng ka jingthied jaka ia ka Council.”
“Nga ba kum u Executive Member jong ka Council ha katei ka por, kumta nga tip bha halor kine ki jingshisha. Nga don ruh ia ki sakhi satar ban pynshisha ia kane ka jingujor ka jong nga ia kaba nga la wanrah hakhmat jong phi,” ong u bah Sumer lyngba ka ejahar ba l ujor pyrshah ia utei u nongialam ka VPP.
Nalor kata une u nongialam ka NPP u la kynnoh ruh lyngba kane ka ejahar ba u Bah Ardent um shym la ioh bor satia na u Executive Member jong ka Council na ka bynta ban iasoi ia ka sales deed bad kane ka sales deed ka dei ruh kaba khlem registar.
“U (Ardent) u la soi ia ka kot ka bym treikam satia tang ban pynthame ban pyni ba la dep thied ia ka jaka bad ba u la bam klop ia ka pisa kaba kot haduh T.35,25,039 na ka account jong ka Council,” ong ka ejahar.
“Hadien ngi la ioh jingtip ba kane ka kot ka dei tang ka Non Judicial kaba T.10.Ia kata ka sale deed kam dei satia kaba la rejistar bad khlem siew ruh ia ka stamp duty. Kumta ka dei ka kot ka bym treikam hakhmat jong ka ain, bad u la soi khlem ka jingioh bor tang ban ioh bam klop ia ka pisa u paidbah,” ong u Bah Sumer ha ka jingujor. U Bah Sumer u la ong ruh ba ka jingmih na kane ka long ba haduh mynta ka Council kam shym la lah ban kam trai ia kane ka jaka bad kala hap buh ia ka Ophis treikam na ka jaka bala shu ai sngewbha da ki trai jaka.
Nalor kata u bah Sumer u la ong ruh ba kane ka kam soi thok jong u Bah Ardent ia ki kot ki sla ki la nang paw hadien ba ka Council ka la phah ia ka notice ha ka 15 tarik Naitung 2022 na ka bynta ban leh ia ka sorbe, kata ia kaba u trai jaka u Bah Nolipstar Lyngdoh ia kaba u Bah Ardent u la kam ba u la iasoi ia ka sales deed u la ong ba um shym la ioh pura ia ka pisa bad kumta um lah ban aiti ia ka jinglong trai ia ka jaka.
Shuh shuh une u EM barim ka KHADC u la ong ba da ka jingthmu ban bam klop shuh shuh ia ka pisa ka Council, u Bah Ardent u la wengkam ruh ia ki hynniew ngut ki nongtrei halor ka nongrim ba ka Council kam don pisa bad hadien kata u la thungkam pat ia 12 ngut ki briew lajong.
“Kuma la kyrpad ia phi ban shim ia ki sienjam jingpynshitom pyrshah ia u Bah Ardent uba donkti ha kane ka kam shukor un ym ioh iaid laitluid hadien ba u la leh ia kane ka kam thok kam shukor pisa pyrshah ia ka Council bad ia ki paidbah,” ong u Bah Sumer ha ka ejahar.”
Lah ban kdew ba na ka liang u president ka VPP ha ka 15 tarik mynta u bnai ula leit ujor da ka ejahar pyrshah ia u Bah Donkupar Sumer halor ka jingkynnoh bamsap pyrshah ia u na ka rynsan ialap ilekshon ha kaba iadei bad kane ka kam thied jaka jong ka KHADC ha ka thain Mawkyrwat.
Facebook
Instagram
Youtube
Twitter
Leave a Reply