Ujor ejahar ka Seng VPP ia kiba pynthohbria ia ka party bad kynthoh khlem akor ia u Phadar

Syllad | The Rising MeghalayaApril 14, 2024

Ka liang pyrshah Voice of the People Party (VPP) ha ka 13 tarik Iaiong, ka la ujor da ka ejahar pyrshah ia ka jingkynthoh lyngba ka facebook page kaba kyrteng “Ka Sur U Myndie Ia ka Ri Ka Jaidbynriew,” ban pynjah burom ia ka party hi baroh kawei.

Ha  ki artylli ki ejahar ba la ujor da u Finance Secretary ka VPP bad u election agent u Bah Danny Langstieh sha u SP ka East Khasi Hills, u Rituraj Ravi la pynpaw ba dang shen kawei ka facebook account kaba ai da ka kyrteng “Ka Sur U Myndie Ia ka Ri Ka Jaidbynriew,”  kala leit ban kynthoh kulmar ha ki social media bad ha ki lad pathai khubor ba pynmih ha ki facebook ban pynjah burom ia ka party VPP da kaba thoh ia ka kyntien ‘Prah’ wat ha ki khubor iap briew kiba mih hapoh ki youtube kumjuh ha kaba iadei bad ka jingdon jong ki riew shim kabu kiba kynthoh wat ia ki nongialam niam da ki kyntien kiba khlem akor da kaba pynbud da ka kyntien ‘Prah.’

Kumta ruh ha kaba iadei bad kane, na ka liang ka VPP ka kyntu jur ia u SP ba un shim ia ki sienjam kiba donkam namar kane ka jingleh ka pynjah burom ia ka party kaba dang don hapdeng ka jingpynkhreh ban iakhun ia ka Ilekshon MP Lok Sabha ka ban long ha ka 19 tarik mynta u bnai.

Nalor kata ka VPP ka la ujor ruh da ka ejahar pyrshah ia ka @jsyiemliehmaduh413 bad @FahvasFahva-me7yk kiba la kynthoh da ktien khlem akor ia u nongialam niam na ka Balang Catholic da kaba pynmih ruh ia ka kyntien Prah.

Katkum ka ejahar ka VPP kala pyntip ba @jsyiemliehmaduh413 bad @FahvasFahva kila kynthoh da ki kyntien khlem akor ia u nongialam niam na ka Balang Catholic ha kawei ka Video ba mih ha YouTube.

Ka VPP kala dawa na ki bor Pulit ban leh ia kaba donkam namar kane ka pynjah burom ia ka Party bad ban pynshitom ia kiba kynthoh kulmar ha ki kyndon Indian Penal Code, 1860 bad Information Technology Act, 2000.