U Wailadmiki Shylla um dei na ka kur Shylla: Madonbai Rymbai

Syllad | The Rising MeghalayaJanuary 27, 2023

U Chief Executive Member barim jong ka JHADC u Madonbai Rymbai ula kynnoh ba u MLA jong ka Jowai u Ma Wailadmiki Shylla um dei na ka kur Shylla hynrei haka jingshisha udei na ka kur Suna bad um dei satia u trai shnong ka shnong Mukhla hynrei ula shu leit buhai shnong ha Mukhla na bynta ka jingmyntoi shimet jong u.

U Ma Rymbai ula ong ia kane haba kren haka jingïalang pynskhem Unit ka TMC na ka shnong Mukhla haka 27 tarik Rymphang 2023.

Kawei pat ka longkmie Ka Kong Thei Shylla president jong ka Mukhla Sohshrieh Women Wing kakla nang pynban shuh shuh iaka jingkren u Madon bad ka la ong ba u Ma Wailadmiki um dei u Shylla hynrei u dei na ka kur Lyngdoh bad ka la ong ruh ba u Wailadmiki ula wan sah shnong marwei ha Mukhla katba ki hynmen ki para jong u ki sah ha Ummulong.

Haba kren bad u Ma Wailadmiki lyngba ka phone, ula ong ba um pat ioh iaka jingtip ba thikna halor ka jingkren kine ki ar ngut bad kane ka dei ka kam kur. Ula ong ba um pat khwa ban ong eiei.

Shuh shuh haba kren ula put turoi ia u Andrew Shullai bad u ong ba u dei u briew uba don ka mynsiem trei shitom bad don ka mynsiem ban tynrong ïaki briew kiba duna ka ïoh ka kot bad dei na kane ka daw kaba pynlong ïa u ban kyrshan ïa u Ma Shullai ha kane ka Election MLA 2023.

Ula ong ruh ba u ma Andrew ula don ki nongkyrshan ha kylleng ki shnong ha Jowai constituency.             

Ula kyntu ïaki nongkyrshan ka TMC naka shnong Mukhla ban long ki nongkyrshan kiba nang ban peitngor bad skhem ka jingmut jingpyrkhat bad ymdei ban ngop haki jingpynbiej bad pynthame jong kiwei ki party.

Ula bynrap ba ha u snem 2018 na kidaw bymlah kiar, ula ai ka jingkyrshan ïa u Wailadmiki Shylla na ka seng NPP bad ula ong ba dei da ka jingbakla jong u (Madonbai Rymbai), ka Jowai Constituency ha u snem 2018 ka la ïoh ïa u nongmihkhmat da u High Level.  

Ha kaba ïadei bad u symbol jong TMC, u CEM barim ula pynïasyriem kum u dawai kymbat u bym don sign effect bad shisien ba la dih, lada ïadei tang ka nusib ka jingpang ka koit noh.

Haba kynthoh ïaka party NPP, ula ong lada ka NPP ka dang ïoh ban synshar biang ka kane ka kynti kaba kham ma shuh shuh na High Level yn poi sha ka jingsynshar Super Level.

Ula pynpaw ïaka jingangnud jong u, ba lada u Andrew Shullai u poi sha ka jingthong jong ka jingjop kaba nyngkong ka long ba u kwah ban kyntiew kyrdan ïaka Thadlaskeiñ C&RD Block sha ka Civil Sub-Division.