U RIEW IEID MARIANG NA LYNDET KI LYOH

Syllad | The Rising MeghalayaJune 4, 2019

“Im ka kyrteng sah ka nam Ma Kambell Chullai”

Da U Soolangki D.Laloo

Ka 5 tarik u Jylliew kaba ngi tip kum ka World Environment Day ka dei ka sngi ha kaba ki ri ha shityllup ka pyrthei ha ka thong ban pynneh pynsah ia ka jingitynnad ka mei mariang bad ki sawdong sawkun jong ka, ki la shim ka jingkitkhlieh ban leh shibun ki kam kum ha ka ban thung ia thied, ki siej, ki syntiew ki skud bad kiwei kiwei ki rukom leh ba iahap bad ka thong jong ka World Environment Day.

Kum u nongthoh haba phai sha kane ka sngi ka wan ka sur ban phalang ha ka pyrkhat pyrdain jong nga ia u wei u riew ieit mariang uba ngim shym la poi pyrkhat ba da ka jingstad bad jingshemphang jong u ki dieng ha ryngkat ki sla jyrngam baphuh itynnad kin iohlad ban neh, ban san bad pynsuhsieng ia ka jingitynnad ki sawdong sawkun ka mei mariang.

Hooid, une u briew wat la um don shuh hangne ha pyrthei shongbasa hynrei ki dak kti bad ki kam ratbah ba u la leh kin long ki mot ba iaineh iaisah bad ieng sakhi ha khmat ka pyrthei teng la pateng. Kum u pateng kane ka juk haba bishar bad pynshongdor pynshongnia ia ka jingpynmih pyrthei ka Khnap thangbru (Eco-friendly Crematorium) ba la shem bad pynwandur da u ma Kambell Chullai ka long shisha ka jingkyrkhu ym tang na ka bynta kito ki briew ba pyndonkam ia ka hynrei ka long ruh kyrpang ia ka mei mariang ha kaba ki dieng ba ju pom bad pynkhyllem da ki bun tynrai na ka bynta ban pyndep ia ka niam iap, ha kine ki sngi ba mynta laioh ban sakhi ba kine kiei kiei kim don shuh naduh ba la mih kane ka Eco-Friendly Crematorium u ma Kambell Chullai.

Haba pyrshang ban iakren bad katto katne ki riew rangbah ia ki rukom ioh myntoi jongki lyngba ka jingdon kane ka Eco-Friendly Crematorium hapoh ki shnong ki Raij jongki, ki iathuh ba ha ki por mynshwa haman badon ka jingiap hapoh ka Raij ka shnong na ka bynta ban pyndep ia ka niam iap bad pynkhuid ia ka met ha ka syiemding ki hap ban pom bad pynkhyllem da ki bun tylli ki tynrai diengheh hynrei mynta naduh ba la pynmih pyrthei u ma Kambell ia ka khnap (Eco-friendly crematorium) ba iahap kat kum ka jingiaid jong ka por, ka jingpom ia ki dieng kam don shuh bad ruh na ka bynta ban pyndep ia ka niam iap ne pynkhuid ia ka met ha ka syiending ki lah ban pyndonkam tang da ki katto katne ki diengrit kiba la dep pynkhreh lypa.

Shim jingkhein ia ka jingpom bad thyllem ia ki dieng haman badon ka jingiap ki briew haman ki shnong ki thaw, kat kum ka jingiathuh ki riewrangbah, la ong ba ym duna ia ka saw ne san tylli ki dieng hap ban pom ne thyllem, shu antad lada ha ka shi snem kan don haduh 10 ngut kiba iap ha kawei ka shnong, ki diengheh kin hap ban pom bad thyllem haduh 40 tylli, to pyrkhat lada ha ka shisnem ha kawei kawei ka shnong ka raij kin duh kin dam ki diengheh da ki bun phew bun spah tylli, kumno kan long ka lyer kaba ngi ring ngi pynhiar mynsiem, kumno kan long ka shnong ka thaw jongngi, kumno kin long ki lum ki wah jongngi? Une u dei u Dak Jingkylli uba manga maphi kum ki pateng kane ka juk ngi dei ban pyrkhat bad puson bha.

Khatduh iawai shwa ban pynkut, ngan buh ia kine ki kyntien, u ma Kambell Chullai lah ban ong u dei u simpyllieng jong ka jingkyrmen bamih paw hadien u lyoh badum, u dei simpah simsong jong ka Bri u 7trep 7skum uba hapdeng ka kyrdan pule barit eh, u lah ban trei ia ka kam kaba khraw kat haduh ba kiwei kiwei ki briew badon hapdeng ki kyrdan pule ba shalor ka pynlyngoh ia ki ban peit bad bishar ia ka jingstad bad jingshemphang u ma Kambell Chullai (Bam kwai ha Dwar u Blei).

Haba shim ban pynshongnia shongnongrim ia kane ka jingstad bad jingshemphang u ma Kambell Chullai ban shna bad pynwandur ia ka khnap thangbriew (Eco-Friendly Crematorium), lah ban ong bad pynshisha ba u dei shisha u riew ieit mariang uba ki kam jongu ki kren khamsawa hangi ki pateng wat la um don shuh ryngkat bad ngi hangne ha sla pyrthei.

Ko khun ka Bri u hynniewtrep hynniewskum, hato kum ia une u briew, kaei ka kamram jong ngi, hato ka donkam mo ia nga ia phi ban ngin pynkhraw bad tynrong shuh shuh ia ka nam bad ka kyrteng jong u? Haba phai na ka liang jong ka Forest & Environment Department sngewtynnad ban tip ba ia kane ka jingstad bad jingshemphang u ma Kambell Chullai la pynsaphriang shuh shuh ia ka sha kiwei kiwei de ki jaka ki shnong. Hynrei kum ka sorkar, kaei pat ka kamram jong ka? Hato kan pynkut noh tang na rmiangshyntur ia ka kyrteng, ka nam bad ki kam u ma Kambell Chullai, hato dei hok mo ia u ma Kambell ha kum kane ka juk ka por ba un ioh ka jingithuh ba kham kyrpang lyngba ka sorkar ne na kiwei kiwei ki kynhun kiba la ioh ban mad ia ka jingkyrkhu lyngba ka Eco-Friendly Crematorium u ma Kambell.