U Monkiru dei uba ioh jamin dang 3 bnai haka kam lehbeijot, ula ngat biang ha u ruhnar ki pulit

Syllad | The Rising MeghalayaJanuary 3, 2024

U Monkiru Shyrmang uba la shah kem noh ha ki pulit ka East Jaintia Hills District haka 1 tarik Kyllalyngkot halor ka jingsuba pyniap iaka (L) Lita Ryngkhlem kaba na Wapung Shnong u dei uba ioh jamin dangshen halor ka kam batbor ia kawei ka kynthei.

Une u Monkiru uba na ka shnong Pamrapaithlu, u dei ula shah kem ha ki pulit ha u bnai Iaiong (April) 2023 halor ka jingkynnoh ba u la batbor ia kawei ka riew kynthei napoh East Jaiñtia Hills. Une u briew ula ioh jamin halor kane ka case, pynban ula ngat biang ha u ruhnar ki pulit halor ka jingshah suba ban pyniap pat iaka (L) Lita Ryngkhlem.

Kumban shu pynkymaw ka (L) Lita Ryngkhlem ka dei ka longkmie kaba jah, ka la mih na la iing ban leit shim dawai na ka Shnong Mookhep ha ka 25 tarik u bnai Nohprah mynshem snem, hynrei kam shym la wanphai iing satia bad ki ba haiing, ki la pynlong ka jingwad iaka.

Pynban ka jingap khmih lynti kiba haiing ba kan wanphai, kala wanrah iaka khubor kaba sngewsih hadien bala shem noh ia ka met kaba sah jong ka haka 31 tarik Nohprah 2023, ha kawei ka jaka kyndong ha Mookhep.

Haka jingiakren bad ki heh pulit jong ka East Jaintia Hills District, la iathuh ba u Monkiru Shyrmang ula phla ba ula leh ia ka kam bymman shwa ban dkhat jubor iaka mynsiem jong ka da kaba shoh bad ksih ia ka na ryndang.

Kane ka jingjia ha Rilum Jaintia ka la wanrah jingkylli na uba bunlang, hato ki riew kynthei ki long shngaiñ ha ka imlang ka sahlang?