U Ma Vincent u dei u ZERO ha Delhi, ong u Chairman ka JHADC

Syllad | The Rising MeghalayaApril 3, 2019

KHANDULI: U Chairman jong ka Jaintia Hills Autonomous District Council (JHADC) u Ma Lakhon Biam u la ong u Kyrtong jong ka Seng Indian National Congress (INC) U Ma Vincent H Pala u dei u Zero ha Delhi namar um la ban iasaid na bynta ka jingeh jynjar jong ki paidbah jong ka jylla.

U la ong ba ki nongshong shnong kiba shong basah ha ki khappud ki hap mad ia jingeh jingshah pyndik na ki bor jong ka Assam hynrei u Ma Vincent uba long u MP la ar sien ne shiphew snem  um pat ju rah ia kane ka ishu jingiakajia khappud ha Parliament namar u leit hangtei tangba shong sngap jar.

U Ma Lakhon u la kren ia kane ha ka jingialang paidbah ha Iew Khanduli haka sngi Balang ban pan ia ka jingkyrshan u paidbah na bynta u kyrtong monlang jong ka Meghalaya Democratic Alliance (MDA) u Dr. Jemino Mawthoh u ba ieng ha ka symbol jong ka party UDP.

U MDC jong ka Nangbah u la ong ba ki MDC jong ka JHADC ki don ryngkat bad ki paidbah kiba shong basah ha khappud ba lada u Dr. Jemino u jop kin sa rah ia ka mat jingiakajia khappud bad u ban rah sha ka Parliament ban iasiad khnang ba ki paidbah kin nym shah pynthut shuh  ha ki bor Assam.  

U Chief Executive Member jong ka JHADC u Ma Thombor Shiwat  ula ong 25 ngut ki MDC jong ka JHADC ki kyrshan ia u Dr. Jemino ha kane ka elekshon namar ba ki shem ba u Dr. Jemino u long u briew uba tbit uba shemphang bad uba la nang la stad ban long u MP sha ka Lok Sabha.

U MDC jong ka Sahsniang u Ma Habahun Dkhar u la ong ba ka constituency jong u ka iasyriem bad ka shnong Khanduli namar ha ka constituency jong u ruh ka shah pyndik ha ki bor jong ka sorkar Assam.

U Deputy Chairman jong ka JHADC u Ma Ailad Bhoi u la kynthoh jur ia u Ma Vincent u la long u MP u bym larkam bad ka jylla haduh mynta ka dang sahdien ha kiba bun liang namar ka jingbymtreikam jong u MP ha ki shiphew snem.

Ka President jong Jowai NPP Block ka Kong Daplin Rymbai ka la ong ba jingjop jong u Dr. Mawthoh kan long ka jingjop jong ka Sorkar Jylla.

Kiwei kiwei kiba la ai jingkren ki long U MDC ka Mowkaiaw u Ma WG Sungoh, u MDC ka Mynsngat Khanduli u Ma Dawan Lyngdoh, u MDC jong ka Ummulong u Ma Jesse Suiam bad u MDC ka Khliehtyrshi u Ma Lakhon Dkhar, Briwon Pohshna haka jingialang kaba pyniaid u Ma Moonlight Pariat, President UDP West Jaiñtia Hills District.