U Ma Sniawbhalang u nong shet kylla ka NPP

Syllad | The Rising MeghalayaJanuary 30, 2019

JOWAI U Chief Executive Member (CEM), Jaiñtia Hills Autonomous District Council (JHADC) Ma Madonbai Rymbai ula ther tyngeh ïa u Ma Sniawbhalang Dhar, Myntri ka tnad Transports bad C&RD ka sorkar jylla namar ka jingsieh kyrtong MDC pyrshah ïa u ha kane ka elekshon MDC JHADC kaban long ha ka 27 Rymphang.

U Ma Madonbai haba kren haka jingïalang paidbah ka dorbar pyllun ka Khliehtyrshi haka sngi Balang, ula ong ba ka khubor hamsaia kala her kylleng ba u Ma Sniawbhalang Dhar ba ula sieh kyrtong ha kylleng ki MDC constituency pyrshah ïaki kyrtong National People’s Party (NPP).

Kane ka kynthup ïa u MB Rymbai ba u ma Sniawbhalang ula pynieng da u Lakhon Dkhar ban pynrem ïa u ha kane ka MDC, la iatthuh u Ma Rymbai.

“Lada kane ka khubor hamsaia ka dei ka jingshisha, u Sniawbhalang u dei u nongshet kylla bad u nongdie ïaka party NPP”, la ong u Ma Rymbai bad ong ruh “Phi ki nongshong shong ka Khliehtyshi bad ma nga, ngi la ai ka jingkyrshan kaba pura ïa u MLA ka Jowai u Wailadmiki Shylla, u kynum trai jong u ma Sniawbhalang ban pynjop bad pynlong MLA ïa u”, la ong u Ma Madon.

“Lada jia ba dei shisha kane ka khubor ka kam MLA Jowai ruh ngin pyrkhat da kumwei halor kane ka jingwan tuklar jong u, uba nabar ka constituencty” ong u ma Rymbai bad ula kop ba ki 10 ngut ki paralok NPP kin jop ha JHADC bad kyntu ïa ki paidbah ba kim dei ban biej ïaka jingkular jingpynbiej kine ki Dhar.