U Jemino un ïasoh bad ka kynhun ba thaw sorkar ha Delhi lada jop: Thombor Shiwat

Syllad | The Rising MeghalayaApril 5, 2019

NAMDONG: U Chief Executive Member jong ka Jaintia Hills Autonomous District Council (JHADC) u Ma Thombor Shiwat ula ong baka Congress party kan nym thaw sorkar ha Delhi namar ïa ka Sorkar yn shna da ka National Democratic Alliance (NDA) ne da ka Third Front bad lada u kyrtong monlang jong ka Sorkar Meghalaya Democratic Alliance (MDA) u Dr. Jemino Mawthoh u jop ïa ka elekshon MP un sa iasoh bad treilang bad kano kano kaba thaw sorkar, kata ka NDA ne Third Front.

“U Dr. Jemino u don bad ka Sorkar Jylla bad uno uno u kyrtong ba pynieng da ka Sorkar u la jop beit bad kata ka long ka histori jong ka Meghalaya”, la ong u Ma Thombor haba kren haka jingïalang paidbah kaba long ha Namdong haka sngi Thohdieng.

La ïadonlang ha kane ka jingialang naduh u MLA ka Mowkaiaw ma Nujorki Sungoh, u MDC ka Khanduli Mynsngat u Dawan Lyngdoh, u MDC ka Ummulong Moodymmai u Jesse Suiam bad kiwei kiwei ki MDC.

U CEM JHADC ula ther ïa u Kyrtong jong ka Congress u Ma Vincent H Pala ba haki ar samoi ka jingling MP jong u, u khlem lah ban wanrah ki roi ki par sha ka jylla bad kane ka dei ka daw ba ka jylla jong ngi ka dang sahdien ha kiba bun liang.

“U ma Vincent u khlem iasaid eiei halor ka jingkhang tih dewiong kumjuh ruh halor ka CAB kaba baroh kawei ka thain Shatei Lammihngi kala ïakhih ban pyrshah ïa kane ka aiñ”, ong u CEM JHADC bad ula bynrap ba ka Sorkar MDA ha ka jingialam u Myntri Rangbah ka Ri U Conrad K Sangma  ki la leit pyrshah sha Delhi ha khmat u Prime Minister Narendra Modi bad la pyndam ia ka CAB.