U Dieng Bilat Ki Poitri Khasi

Syllad | The Rising MeghalayaDecember 17, 2023

Ha ki syrwet ksai ka Duitara ksiar, kyn’ih ryndang u kaitor da ki sur ban kyrsiew la jaitbynriew, ki sur phar-shi ia ki jingshisha bad jingshai jong ka mynnor; hynrei ki pher bad kylla ha jing-tyllun ka por. Dei ha ka snem 1873 bad ha kyndong jong  ka ri khasi, khie lung u ‘tiew pher u ‘tiew phylla , u ba niar na kiwei bad u ban kit lyngkhung kit lyngkor sha ka nam. U ‘tiew dohmaw ka thoh ka tar iala jingshai un sei bad un sam. U kaitor ki phawar  u myllung ki poitri; sha ka pyrthei un pyrta bad  kynrong la kyrteng jong ka ri.

Ha Saitsohpen, Sohra ha ka long-iing baduk jong I Kong Lyngkien Tham bad I Bah Hat Tongper la kha ia u Soso Tham (1873-1940). Ula pyndep tang haduh ka kyrdan pule ba Phra na ka daw jong ka jingduk kaba khanglad ia u ban pule shuh shuh. Hynrei une tang ha ka kyrdan ba rit ba u ioh ban pyndep hynrei u long pat u ba trei shitom bad minot thop haduh ba un long syndon u Nonghikai High School ha ki snem 1905 haduh 1931.  Ka jingim jong u Soso Tham ka dap da ki jingeh bad jingtynjuh kiba u tyngkhuh bad kynduh naduh ki por ba u sdang ban ring sur ia ki parom bad ki jingshai jong u mynbarim ha ka dur ki poitri bad ha ka thoh ka tar . Kawei na ki daw ka long ba duna bha ba ai mynsien ne jingkyrshan ia u namar bun ki      i-bein ia u ba u long tang u nonghikai ba pyndep iala jingpule ha i kyrdan i barit. Hynrei ka mynsien shitrhem ban kyntur bad ialeh ban niom shakhmat ka prat lynti ia u ban poi sha ki kyrdan jong ka nam.

Ka kot ‘Ki Phawar u Aesop’ (1920) bad ka kot sur poitri ‘Duitara Ksiar’ (1925) nalor kiwei de kila kylla long ki kot kiba pawnam bha ha Ri Khasi-Jaintia jong ngi bad kiba pule da baroh ki khynnah pule wat haduh ki rangbah rangsan ruh. Ki jingthoh kiba u thoh ki thew bad kdew ia ki jingshisha baroh katkum ki kyrdan jong ka jingim. Ka rukom pyrkhat pyrdain ba shisur bad shi-dur jong u ka iaid ryngkat ryngkat bad ka jinglong nylla jong ka mynnor bad ka imlang sah lang jong u khasi khara ha ryngkat bad ka mariang.

U pynshong nia ia ka jingim khasi jong ngi ryngkat ryngkat bad ka hok ka sot naduh ka ktien ka kam haduh ka jinglong jingman. Uda thew shuh shuh ia ka jing kordor bad ka kamram jong ngi ban ri ban sumar la ka dustur ka riti bad ban pynphuh pynphieng ia ka kum ki long trai man trai ha shuwa ban ngin ryngkoh bad tur sha kper kiwei hajrong ki kyntien pharshi kiba u ong ‘jingshai ngi wad sawdong pyrthei, jingshai ka ri ngim tip ei ei’. Uda thew lypa ia ka jingiohi jngai ka jong u ia ka jinglong bad jingsmat jong ngi bad bud tynneng ia ka jong kiwei khamtam ia ka jong ki ri sep-sngi kaba wanrah pat ia ka jingkylla ha ka rukom pyrkhat pyrdain bad rukom im jong u Khasi.

Uda prat bad pyni lynti ruh ia ngi ba ngin long ki briew ba raikut ha ka kam ba ngi leh bad ban da pyndep hi ruh thik kumba ngi sdang khlem da pynsngap ne ailad ia ki jingeh ba kin khang lad ne khang lynti ia ngi hynrei ba ngi dei ban shim nuksa  ia ka jinghikai bad jinglong ba ngi ioh ban peit pyrthuh bad sakhi na u diengbilat uba lah ban shah ia ki saw samoi ki saw aiom, uba shah ia ka lyer ka tyrsi, uba shah ia u slap u phria, uba shah ia ka shit ka khriat katba u siam pat ki thied shapoh ban skhem la ka tynrai kumjuh ruh u da piar ki tnad shajrong bad  suh ban kiew sha bneng ha ka  rynieng ka ryniot jong u.

Ka pyrkhat pyrdain ba nylla u myllung ban wanrah bad sam ia ki jingshai jong ki sngi bala leit u mynbarim u longshwa manshwa jong ngi ka ai jinghikai pat ia ngi ban ksoh bad bat ryntih ryntih ia ki naduh ka ktien ka thylliej ba shong sbai, ka riam don burom don akor, ka iaid ka ieng, ka rukom im hok  trei hok bad ka kamai hok, ka mynsien basbun bad ba don ka jing tiplem para briew  khamtam eh ban ieid bad burom Blei. Ki parom sawdong  lyng-wiar dpei kiba u wanrah ia ki jinghikai jong ka mynnor kum ban pynkyndit bad kyrsiew  ia ka jingmut jingpyrkhat ka jong ngi na ka bynta ban tip ia ki jingshai baa jinghikai u mynbarim ha ka pateng jong ngi bad ba shadien.

Ki matti sah nam ki ba u myllung u ai ha ngi dei ka jingkieng ba skhem kaba u sam ha ngi ban phai dien sha ka jingstad bad ka puron jong ki jingshai bad jinghikai ka mynnor ha shwa ba ngin tur bad ryngkoh pat sha ki jingshai ka mynta bad ka lawei. Ha ki sngi ba mynta lei lei kiba ka pyrthei ba kylla bad ba bun tang ka bishni ka pi-huin, ka kdew kti kdew kjat bad ka woh nia woh dong bad rhah tang ia ka myntoi bad ioh nong marwei, ka imlang sahlang kala kylla dur, kylla triem bad bym don jing sngew para bynriew shuh khamtam ia u bapli u duk u juki kaba bunsien ka wanrah tang ki jing jynjar jingshitom ha baroh ki liang.   

Ha ki sngi ba mynta ka jingleh burom ia u myllung ka dei ha ka 18^th December kaba dei ka  sngi khlad ka jong u (18^th December,1940). Ki jinghikai bad ki jingthoh jingtar jong u Soso Tham pat kin iai pyrto bad iai khraw ha ki lai-phew pateng shadien namar khlem da ki sharak jingshai jong ka mynnin, kan ym long ka mynne bad khlem ka mynne kam ym khie lung pat ka lashai.

Sa shisien to ngin da ia phai biang sha ki jinghikai jong ki jingshai ka tynrai khnang ban skem ka  mynnor lyngba ka pyrkhat pyrdain ba kara ba pura bad ban ia kynrong lang iwei ia iwei ha baroh ki liang khnang ban ngin lah pat  sa shisien ban im katkum ka jingbthin lynti u myn-barim ia ka jaitbynriew ba kyrpang bad ba kyntang na ka bynta ka lawei ba shongkun bad ba phuh ba phieng  jong u mandien jong ngi pat.

Da u Juhhi Nanghuloo | Panaliar, Jowai