Tur ka JSU bad kynhun nongdie jhur sha ophis DC Jowai, yn siew bai lutksan iaki nongdie jhur

Syllad | The Rising MeghalayaJune 21, 2021

Ki Jaintia Students’ Union haka sngi Nyngkong kala leit khnang ban kynduh ia kiba shongdie die jhur die soh ha Iawmusiang, Jowai hadien ba ki pulit Jowai kila kurup iaki mar ki mata bad iaki jhur ki soh jong ki ha ka taiew kaba la dep.

Ki nongialam ka JSU kila lumlang ia kine ki nongdie jhur bad ki la tur sha ka phyllaw ka ophis u DC ban iakren bad u DC. Ka JSU kala kam ba u DC ula kular ban shim khia halor kane ka phang hadien ka jingiakren bad ki nongialam ka JSU bad ki nongshong iew ha Iawmusiang.

U DC ka West Jaintia Hills hadien ka jingiakren bad ki nongialam ka JSU bad ka kynhun ki nongdie jhur la phah shim ia ki kyrteng kiba shah knieh ki khur ki soh bad yn sa lah ban siew ia ka bai luksan sha kine ki nongdie jhur.

Shuh shuh ka JSU ka la ai jingmut ia ka bor District ban pynbiang ia ki jaka ba pura khnang ba kiba shongdie kin iohlad ban ia die ia thied bad ban lait na ki jingklumar bad ki bor ka aiñ bad ha kajuh ka por ban bud ryntih ruh ia ki hukum ka koit ka khiah, khnang ban lait ka ka jingiabit COVID-19.

Na ka liang ka JSU ruh ka ai khublei halor ka jingshim khia u DC ban ailad iaki nongshong iew bad ki nongdie madan ban shong die haka jaka kaba biang bala pynbeit da ki nongpyniaid iew.

Ka JSU kala kyntu sha baroh ki paidbah ban iatreilang ha kum kane ka por bad ban burom iaka aiñ ka tnat ka koit ka khiah ban lait na ka jingbit na u COVID-19 bad ban lait noh na ka jingkhang dam kaba lah neh slem bha.