Thwet ki Pulit West Jaintia ia kiba shah kynnoh thmu pyniap ia u Waheh Shnong Maskut

Syllad | The Rising MeghalayaMay 16, 2020

KI Pulit jong ka West Jaintia Hills District hadien ka jingshah thombor bad thmu pyniap ki runar ïa u waheh shnong jong ka Maskut, kila pynlong ka jingtohkit bad ithuh ïa ki briew kiba suba donkti ha kane ka kam.

Kane ka jingjia kala jia haka 13 tarik une u bnai, ha Umshohthad hajan ka shnong Maskut, ha kaba la kynnoh baka kynhun jong ki briew kiba ithuh dur khmat kila thombor da ki tiar mynsaw ïa u waheh shnong Maskut u Kyrsiew Kharbithai bad u secretary ka skim bylla sng Jairous Tariang.

Ki Pulit hapoh ka jingialam u Dy SP Headquarter Bah MJ Marngar bad u Dy SP Law and Order Jason Mairom kila pynlong ka jingtohkit ban ithuh iaki briew kiba donkti ban thombor ia une u nongialam shnong.

“Ki don ki suba kiba na ka shnong Moodymmai, hynrei ngin hap ban pynthikna ban ithuh ïaki briew shuwa ban kem,” ong u Dy SP Headquarter bad bynrap la suba jur ba kane ka jingjia ka jia dei n aka daw ka jingia khajia pud sam hapdeng ka Moodymmai bad Maskut.

Ula ong ruh ba ki don bun ki jingujor hapdeng kine ki ar shnong ha ka jingiadei bad kam iakhajia pud bad bunsien la kyntu ia ki ba kim bit ban shim iaka aiñ ha kti bad kano kano ka kam iakhajia pud dei ban pynbeit ha iingbishar.

U Bah Jason ula ong ba kila dep register iaka case hapoh ka section 326/307/506/34 IPC bad ka jingtohkit kala iaid shakhmat.

Haduh bala thoh iaka khubor ki pulit kim pat kem iano iano.